Aqtóbe, Túrkistan jáne Qyzylorda áýejaılary ınvestorlarǵa senimgerlik basqarýǵa beriledi

<p>Aqtóbe, Túrkistan jáne Qyzylorda áýejaılary jahandyq iri ınvestorlarǵa senimgerlik basqarýǵa beriledi. Bul týraly Úkimet otyrysynda Kólik mınıstri Marat Qarabaev aıtty, dep habarlaıdy Kazinform.</p>

«Elimizdiń áýejaılarynda mýltımodaldy ortalyqtar qurý maqsatynda qajetti quzyreti men kapıtaly bar jeke ınvestorlardy tartý boıynsha keshendi jumystar júrgizilip jatyr. Onyń aıasynda Astana, Almaty jáne Shymkent áýejaılaryna ınvestorlar tartylyp, ushý-qoný jolaqtaryn, janarmaı quıý keshenderin rekonstrýktsııalaý, jolaýshylar jáne júk termınaldaryn keńeıtý jumystary kezeń kezeńimen iske asyrylýda», - dedi mınıstr.

Onyń atap ótýinshe, Qaraǵandy áýejaıynda ınvestor ushý-qoný jolaǵyn jáne qajetti arnaıy tehnıkany jańǵyrtýdy josparlap otyr.

«Al Aqtóbe, Túrkistan jáne Qyzylorda áýejaılaryn osy salada tájirıbesi bar jahandyq iri ınvestorlarǵa senimgerlik basqarýǵa berý boıynsha kelissózder júrgizilýde. Jalpy, atalǵan jumystarǵa 2 mlrd 400 mln dollar jeke ınvestıtsııa, sonyń ishinde sheteldik ınvestıtsııalar tartylyp jatyr», - dedi Marat Qarabaev.