«Aqtóbe» syrt alańda «Jetisý» komandasynan basym tústi

ASTANA. QazAqparat – Búgin fýtboldan Premer-lıga komandalary arasyndaǵy el birinshiliginiń 1-týrynda «Aqtóbe» syrt alańda «Jetisý» komandasyn jeńdi, dep habarlaıdy QazAqparat tilshisi.

Atalǵan kezdesý Almaty qalasyndaǵy «Jas qyran» stadıonynda ótkizildi. Oǵan sebep – Taldyqorǵandaǵy stadıonnyń daıyn bolmaýy.

Kezdesý barysynda komandalar tezirek gol soǵý múmkindigin izdedi. Dese de, birinshi kezeńinde qaqpa qulpy ashylǵan joq.

Ekinshi kezeńde qos qaqpa mańynda qaýipti sátter az bolǵan joq. Nátıjesinde, 83-mınýtta aqtóbelik jas shabýylshy Maksım Samorodov kezdesý taǵdyryn sheshken jalǵyz goldyń avtory atandy.

Osylaısha, «Aqtóbe» qarsylasynan 1:0 esebimen basym túsip, birinshiliktegi alǵashqy jeńisine qol jetkizdi.

Sondaı-aq, búgin «Ordabasy» óz alańynda «Kaspııden» basym tústi.

Qazir «Tobyl» (Qostanaı) men «Aqsý» (Pavlodar oblysy) kezdesýi ótip jatyr. Odan keıin elordada «Astana» men «Shahter» (Qaraǵandy) oınaıdy.

Erteń, 5 naýryzda «Maqtaral» (Túrkistan oblysy) men «Oqjetpes» (Kókshetaý), «Qaırat» (Almaty) pen «Atyraý», «Qaısar» (Qyzylorda) men «Qyzyljar» (Petropavl) sheberlik baıqasady.