Aqtóbe shekarasynda áskerı qyzmetshi áriptesin atyp óltirdi

<p>Aqtóbe oblysy Mártók aýdanyndaǵy Qııaly shekara zastavasynda 22 jastaǵy Mátjan Janesenov kóz jumdy. Oǵan áriptesi oq atqan, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Aqtóbe garnızonynyń áskerı prokýratýrasynyń habarlaýynsha, oqıǵa 2 jeltoqsan kúni bolǵan. 

— QR UQK Aqtóbe oblysy boıynsha shekara qyzmeti departamentiniń «Qııaly» shekara zastavasynda kelisimshart boıynsha eńbek etetin áskerı qyzmetshi áriptesimen janjaldasyp qalǵan. Sodan keıin ózine bekitilgen qarýdan oq atqan. Jábirlenýshi jedel járdem kóliginde qaıtys boldy. Atalǵan fakti boıynsha Batys óńirlik áskerı tergeý basqarmasynyń Aqtóbe bólimi Qylmystyq kodekstiń 99-baby 1-bóligi boıynsha sotqa deıingi tergeýdi bastady. Qylmystyq is boıynsha kúdikti ustaldy. Qazirgi ýaqytta tergeý amaldary júrip jatyr. Basqa málimetter QPK 201-babyna sáıkes jarııalanbaıdy, — dep habarlady Aqtóbe garnızonynyń áskerı prokýratýrasy.  

Aıta keıik, Mátjan Janesenov — Aqtóbe oblysy Baıǵanın aýdanynyń týmasy.

Foto: Aıgúl Janesenqyzy

— Otbasyna qamqor bolyp otyrǵan bala. Áli sene almaı otyrmyz, — dedi apasy Aıgúl Janesenqyzy.