Aqtóbe sharýalaryna asyl tuqymdy iri qara tegin beriledi

AQTÓBE. QazAqparat - Aqtóbe sharýalary asyl tuqymdy iri qarany tegin ala alady. Tek jyl saıyn tóldiń teń jartysyn «Aqtóbe» ÁKK» AQ-na berip otyrýy tıis, dep habarlaıdy QazAqparat tilshisi.

«Aqtóbe» ÁKK» AQ 2,2 mıllıard teńgege Avstralııadan 2500 bas múıizdi iri qara satyp ákelýdi josparlap otyr. «Gereford» tuqymdy iri qara keıin sharýalarǵa tegin taratylady.

«Sharýashylyqtarǵa nesıe tóleý óte qıyn. Sondyqtan «Aqtóbe» ÁKK «Agrobıznes» baǵdarlamasy aıasynda «Agrarlyq nesıe korporatsııasy» AQ-nan nesıe alady. Bir sharýashylyqqa kem degende 250 bas iri qara tegin beriledi. Kelesi jyly tóldeıdi, sol tóldiń teń jartysyn «Aqtóbe» ÁKK» AQ-yna berýge mindetti. 5 jyldan soń 250 bas asyl tuqymdy iri qara da sol sharýashylyqta qalady», - dedi «Aqtóbe» ÁKK» AQ basqarma tóraǵasy Anýar Mahanov.

Sharýashylyqqa jem-shópti ýaqtyly daıyndaý, asyl tuqymdy iri qaraǵa qajetti keshenmen qamtamasyz etý talaby qoıylady.

«Asyl tuqymdy iri qara satyp alý úshin Kanada jáne Avstralııa elderi tańdaldy. Kanadada baǵa qymbat bolǵan soń Avstralııaǵa toqtaldyq. Qajet bolsa kórshiles Reseıden de alýǵa bolady. Etti baǵytty tańdap otyrmyz», - dedi Anýar Mahanov.