Aqtóbe prokýratýrasy qańtar qyrǵynyna qatysty tergeý qalaı júrip jatqanyn aıtty
Aqtóbe oblystyq prokýratýrasy quqyq qorǵaý organdarymen birlesip, qańtar aıyndaǵy oqıǵalardy tergeý jumystaryn jalǵastyryp jatyr.
Aqtóbede beıbit mıtıng aldymen Jańaózen qalasynyń narazylyq bildirýshilerin qoldaýdan bastalsa, keıin túrli kúshtermen jappaı tártipsizdik uıymdastyrylǵan.
Uıymdastyrýshylar polıtseılerge kúsh qoldana otyryp, oblys ákimdiginiń ǵımaratyn basyp aldy. Memleket múlkin búldirdi (230 mln teńge shyǵyn), sonymen qatar Aqtóbe qalasy áýejaıynyń jumysy toqtap, ushaqtardyń ushýy toqtatyldy.
Arandatýshylardyń yqpalymen Áıteke bı, Hromtaý, Temir jáne Muǵaljar aýdandarynda da aktsııa ótti.
«Qazirgi ýaqytta quqyq qorǵaý organdarynyń tájirıbeli qyzmetkerlerinen quralǵan vedomstvoaralyq jedel-tergeý toby jáne arnaıy prokýrorlardyń basshylyǵymen 14 qylmystyq is, sonyń ishinde 2 terrorıstik qylmys boıynsha sotqa deıingi tergeý júrgizilip jatyr. Kúdikti retinde 12 adam qamaýǵa alynyp, 8 adam úı qamaqqa jiberildi. Sondaı-aq quqyqtyq tártipti qamtamasyz etken 31 qyzmetker jaralandy. Qyzmettik kólik jáne arnaıy quraldar zaqym keltirildi. Barlyǵyna baılanysty quqyq qorǵaý organdary obektıvti quqyqtyq baǵa beredi», - dep habarlady oblystyq prokýratýranyń baspasóz qyzmeti.
Aıta keteıik, tergeýdiń ruqsat etilmegen ádisterin qoldanǵan polıtsııa qyzmetkerlerine qatysty da sotqa deıingi 4 tergeý jumysy júrgizilip jatyr.
Barlyq is boıynsha protsessýaldyq prokýror taǵaıyndaldy.
«Ustalǵandardyń týystary men olardyń qorǵaýshylary úshin Aqtóbe oblysynyń prokýratýrasynda kúndelikti jeke qabyldaý uıymdastyryldy. Olarǵa barlyq qajetti quqyqtyq jáne túsindirý kómegi kórsetiledi. Ótinishter men shaǵymdar qarastyrylady. Kezekshi prokýrordyń telefonyna kelip túsken qońyraýlar zerdelenedi», - habarlady oblystyq prokýratýranyń baspasóz qyzmeti.