Aqtóbe oblysynyń qýańshylyqqa daıyndyǵy qandaı
Baspasóz konferentsııasynda Ońdasyn Orazalınge Hromtaý, Áıteke bı aýdandarynda bolýy yqtımal qýańshylyqqa daıyndyq qalaı júrip jatqany týraly saýal qoıyldy.
«Birinshiden, bári de adam balasynyń ózine baılanysty bolady. Eger aldyn ala qamdansa, Aqtóbe óńirinde tolyq múmkindik bar. Biz jergilikti ákimdikterge, aýyl sharýashylyǵy basqarmasyna, aýdan ákimderine ár sharýa qojalyqpen tikeleı jumys isteý týraly tapsyrma berdik. Qazirgi tańda shabyndyq ta, jıylym da jetkilikti. Biraq keıbir jerlerde aýa raynyń qolaısyzdyǵy saldarynan qaýip bar ekenin baıqap otyrmyz», - dedi aımaq basshysy.
Onyń aıtýynsha, qazir aqtóbelik sharýalar qysqa daıyndalýmen qatar kórshi óńirlerdegi jutqa ushyraǵan eldi mekenderge kómek qolyn sozyp jatyr.
«Sonymen qatar, kórshiles Mańǵystaý, Atyraý óńirlerindegi baýyrlarymyzǵa shóp jetkizý máselesimen de aınalysyp jatyrmyz. Oǵan qosa ózimiz de qapyda qalmaıyq dep, kúzge deıin keminde 1,5 áıtpese, 2 norma kóleminde qystyq azyq daıyndaý týraly tapsyrma berdik. Biraq naryqtyń aty – naryq. Byltyr da sondaı jaǵdaılar bolǵan. Keıbir sharýa qojalyqtary daıyndaǵan jemshópti aqshaǵa qyzyǵyp, satyp jibergen. Qys uzaryp ketip, solardyń keıbiri shyǵynǵa ushyrady. Sol sebepti sharýa qojalyqtaryna áýeli óz daıyndyǵyńyzdy qamdap, sodan keıin ǵana satýdy oılańyzdar dep aıtyp otyrmyz. Meniń oıymsha, bıylǵy kóktem birazyna sabaq boldy», - degen oblys ákimi búginde Aqtóbe oblysyndaǵy iri qara men jylqy sany keńes kezindegi mólsherden artyp ketkenin aıtty.
«Mal azyǵyn daıyndaýǵa qarjylaı qoldaý kórsetip otyrmyz. Tehnıka satyp alýǵa respýblıka boıynsha 25 paıyz sýbsıdııa tólense, biz óz bıýdjetimizden ústine 10 paıyz qosyp berdik. Byltyr 19,2 mlrd teńge bolsa, bıyl 20 mlrd teńgeden asyp ketti. Qazir aýyl sharýashylyǵy salasynda myńdaǵan joba iske asyrylýda. Kásipkerlerdiń arasynda mal ósirýge, sút pen et óńdeýge, kókónispen, baý-abqashmen, qaýyn-qarbyzben aınalysýǵa qyzyǵýshylyq joǵary. Osyndaı yntalandyrýdyń arqasynda 30 jyldyń ishinde jylqy sany - eki ese, iri qaranyń sany 8 paıyzǵa ósken», - dedi Ońdasyn Orazalın.