Aqtóbe oblysynyń eki aýdanyndaǵy vetlaboratorııada koronavırýsty anyqtaıtyn zerthana ashylady

AQTÓBE. QazAqparat – Aqtóbeniń eki aýdanynda veterınarııa laboratorııalary bazasynda koronavırýsty anyqtaıtyn zerthana ashylady, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Ótken táýlikte Aqtóbe oblysynda 5 adamnan koronavırýs ınfektsııasy anyqtaldy. Vırýs juqtyrǵandardyń sany azaıyp, ókpe qabynýy dertine shaldyqqandar qatary sıredi. Oblys ákiminiń birinshi orynbasary Nurjaýǵan Qalaýov jıyn kezinde aımaqtaǵy epıdemıologııalyq jaǵdaıdyń kórsetkishine toqtaldy.

«Áıteke bı, Temir aýdandarynda veterınarlyq laboratorııalar bazasynda zerthana ashylady. Aımaqta aýrýǵa shaldyǵýshylardyń sany tómendegen. Kereýet sany 78 paıyzdan 33,4%-ǵa deıin azaıdy. Provızorlarda 575 oryn jabyldy, 1 335 kereýet rezervke aýystyrylǵan. Jedel járdem qyzmetine túsetin qońyraý sany 2 600-den 700-ge deıin tómendedi. Kún saıyn 160-qa jýyq naýqas statsıonarǵa jetkizilse, qazir olardyń sany 20 adamǵa deıin tómendedi», - dedi oblys ákiminiń birinshi orynbasary Nurjaýǵan Qalaýov. Oblys ákimi atalǵan baǵyttaǵy jumystardy jandandyrý qajet ekenin aıtty.

«Naýqastar sanynyń azaıǵanyn aıtyp, arqany keńge salýǵa bolmaıdy. Kúzde ekinshi tolqyn bola qalǵan jaǵdaıda oǵan daıyn bolýymyz kerek. Turǵyndardyń saqtyq sharalaryna degen jaýapkershilikterin arttyrý qajet. Kóshelerde betperdesiz júrgender kóp. Sondaı-aq, qarjy bólingendigine qaramastan sońǵy kezderi zalalsyzdandyrýdyń júrgizilip jatqandyǵyn múlde kezdestirmeıtin boldyq. Naýqandyq jumysqa uqsatpaı úzdiksiz júrgizýdi jalǵastyryńdar», - dedi Ońdasyn Orazalın.

Oblys ákimi Polıtsııa deparamentiniń birinshi orynbasary Qanat Álıevke túnde qadaǵalaýdy kúsheıtip, tártipsizdikti boldyrmaýdy, zań buzýshylyqtyń aldyn-alýdy tapsyrdy.