Aqtóbe oblysynyń birneshe aýdanynda shegirtke qaptady
Aqtóbe oblysynyń Áıteke bı aýdanyndaǵy eki aýylda jaǵdaı múlde qıyn. Bul jerde dala jerde ǵana emes, aýyl ishine de shegirtke qaptaǵan.
«Búginde aýdan boıynsha 444 myń gektardan astam jerdi óńdeý josparlanǵan. Óńdeýge AN-2 ushaǵy, 3 deltaplan jáne birneshe kólik jumyldyryldy.
Ashyǵyn aıtqanda, bıyl jer óńdeý kólemi eki ese kóp. Byltyr 220 myń gektar boldy. Shegirtke de kóp. 23 mamyr kúni alǵash ret shyqqany týraly aqparat tústi. 30 mamyrda ýlaý jumysy bastaldy. 4-5 jylda sharyqtaý shegi bolady deıdi. Ásirese aýdan ortalyǵynan alys Aqqum, Sarbulaq aýyldary qumdy jerde ornalasqan.
Shegirtke jumyrtqasyn qumǵa salyp, tez taraıdy. Qumǵa kólik bara almaǵan soń ushaqtar jiberildi.
Basqa aýyldarda da bar. Biraq eń kóbi osy eki aýyl. Keshe 102 myń gektar jer ýlandy. Aýdan ortalyǵy Júrgenovtiń ózinde kún daýyl, jel. Ol kezde ýlamaıdy. Sebebi nátıje bolmaıdy»,- dedi Áıteke bı aýdany ákiminiń mindetin atqarýshy Arman Aldabergen.
Al Aqtóbe oblystyq aýmaqtyq ınspektsııasy ósimdikterdi qorǵaý jónindegi memlekettik ınspektsııanyń habarlaýynsha, bıyl shamamen 670 myń ga jýyq jer úıirli shegirtkelerge qarsy óńdeledi. Olar Áıteke bı, Oıyl, Temir, Hromtaý, Shalqar, Yrǵyz aýdandary. Kóp jerde ıtalııalyq shegirtkege qarsy ýlaý júrgiziledi.
«Respýblıkalyq fıtosanıtarlyq dıagnostıka jáne boljamdar ádistemelik ortalyǵy» RMM Aqtóbe oblystyq fılıalynyń habarlamasyna sáıkes, bıyl 16 mamyr kúni Aqtóbe oblysynyń Shalqar aýdany ortalyǵynda, 17 mamyr kúni Yrǵyz aýdanynyń ortalyǵy men Qyzyljar, Qumtoǵaı aýyldyq okrýgterinde, 18 mamyr kúni Oıyl aýdany Qaraoı aýyldyq okrýginde, 25 mamyr kúni Hromtaý aýdany Bógetsaı, Qopa aýyldyq okrýgterinde jáne 26 mamyr kúni Temir aýdany Sarkól okrýginde, Áıteke bı aýdanynda ıtalııalyq shegirtke dernásilderiniń jappaı shyǵýy tirkeldi.
Hımııalyq óńdeý jumystary Shalqar aýdanynda 22 mamyr, Yrǵyz aýdanynda 23 mamyr, Oıyl aýdanynda 26 mamyr, Áıteke bı aýdanynda 31 mamyr jáne Temir, Hromtaý aýdandarynda 1 maýsym kúni bastaldy.
Qazirgi ýaqytta, 11 jerústi jeldetkish búrikkishter,10 aerozoldy generator, 3 dana AN-2 ushaǵy, 3 jeńil ushaq hımııalyq óńdeý jumystaryn júrgizip jatyr.