Aqtóbe oblysynyń bas polıtseıi jappaı tártipsizdikterdiń hronologııasyn aıtty

AQTÓBE. QazAqparat – Aqtóbe oblystyq Polıtsııa departamenti qańtarda bolǵan jappaı tártipsizdik týraly jan-jaqty aqparat berdi. Vedomstvonyń baspasóz qyzmetiniń málimetinshe, terrorızm aktisine qatysqan bir adamnyń kózi joıylǵan, dep habarlaıdy QazAqparat tilshisi.

Aqtóbe oblysy ákimdiginiń aldyna jınalǵan jurt aldymen beıbit túrde talabyn qoıyp, onyń oryndalýyn kútti. Tek oblys ortalyǵynda emes, aýdandarda da dál osyndaı jaǵdaı boldy.

Oblystyq Polıtsııa departamenti baspasóz qyzmetiniń habarlaýynsha, beıbit mıtıngini keıin radıkaldar óz maqsatyna paıdalandy.

«Narazylyq bildirýshiler avtojoldardy, onyń ishinde halyqaralyq mańyzy bar trassalardy, temirjoldardy jaýyp tastady. Saldarynan áýe jáne temirjol tasymaly toqtatyldy. Demonstranttar, olardyń arasynda alkogol áserinde bolǵan adamdar bılik pen quqyq qorǵaý organdarynyń ókilderine qarsylyq bildirip, agressıvti túrde sóıledi. Tas, azyq-túlik, alkogol jáne basqa zattardy tasymaldaý uıymdastyryldy. Kıiz úı tigildi, ot jaqty. Konstıtýtsııaǵa qarsy urandar aıtyldy. Sherýge qatysýshylardyń áreketteri aıqyn jáne úılesimdi boldy.

5 qańtarda mıtıngige shyqqan 4-5 myńǵa jýyq adam polıtsııaǵa qarsylyq kórsetip, armatýra, tutandyrǵysh qospalardy, «Molotov kokteılin» paıdalandy. Tas laqtyryp, birneshe qorǵanys syzyǵynan ótti. Sóıtip oblys ákimdigi ǵımaratyna basyp kirdi. Polıtsııa qyzmetkerlerin kólikpen qaǵyp ketti», - dep habarlady oblystyq PD baspasóz qyzmetiniń jetekshisi Erbolat Sarqulov.

Saldarynan 25 polıtsııa qyzmetkeri men 3 áskerı qyzmetshi túrli dárejedegi dene jaraqatyn aldy. Sonymen birge 7 qyzmettik kólik, 300-den astam arnaıy jeke qorǵanys quraly búlindi. Jedel járdim kóligi tonaldy. Órt sóndirý kóligin tartyp almaq boldy ári qyzmetkerlerdi uryp-soqty. Ákimshilik ǵımaratqa kirgen kúdiktiler mamandandyrylǵan kúzet qyzmetkeriniń tabeldik qarýyn ıemdendi.

«6 qańtarda narazylyq bildirýshiler oblys ákimdigi aldyndaǵy alańda qalyp, oblys halqyn úırelendirip otyrdy.

Quqyq tártibin qalpyna keltirý maqsatynda 7 qańtarǵa qaraǵan túni arnaıy, quqyq qorǵaý organdary men áskerı qyzmetshiler alańdy tazartý jáne oblys ákimdigi ǵımaratyn kúdiktilerden bosatý boıynsha operatsııa júrgizdi.

Operatsııa barysynda qarsylyq kórsetildi. Qaqtyǵys barysynda terrorıstik aktige qatysýshylardyń biriniń kózi joıyldy.

Terrorızm aktilerin, jappaı tártipsizdikti uıymdastyrý, bılik ókilderine qatysty zorlyq-zombylyq kórsetý, memlekettik ǵımarattarǵa shabýyl jasaý jáne olardy basyp alý deregi boıynsha 13 qylmystyq is qozǵaldy.

Qazirgi tańda jalpy sany 1,5 myńǵa jýyq adam ustalyp, polıtsııa organdaryna jetkizildi. Olardyń ishinde asa aýyr qylmys jasady degen kúdik boıynsha 15 adamga qatysty sot «kúzetpen ustaý» túrindegi bultartpaý sharasyn sanktsııalady. Al 417 azamat ákimshilik qamaýǵa alyndy, qalǵandaryna qatysty tekserý jáne jedel is-sharalar júrgizilip jatyr», - dedi Erbolat Sarqulov.