Aqtóbe oblysynyń ákimi: ınternet bolmasa, aýylda jastar turmaıdy
«Eń úlken máseleniń biri – aýylda adam qalsyn desek, ınternetti tolyq engizý kerek. Internet bolmasa, búgin aýylda jastardyń da turmaıtyny belgili. Nege? Sebebi, bul – ómir men ýaqyttyń talaby. Sondyqtan ótkende mınıstr Baǵdat Mýsınmen birge 99%-ǵa deıin ınternetpen qamtýdyń jobasyn daıyndadyq. Ony iske qossaq, telemedıtsınany da engizýge úlken múmkindik bolady», - dedi E. Toǵjanov Senattaǵy «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy parlamenttik tyńdaýda.
Sonymen qatar ol bilim berýge jaǵdaı jasaý qadamdaryna toqtaldy.
«Sondyqtan biz Bilim All jobasyn engizdik. Bir muǵalimniń 5 pán boıynsha sabaq berýin tolyq toqtattyq. Endi bul ashyǵyn aıtqanda ózimizdi de, balalardy aldaý dep oılaımyn. Sondyqtan bul toqtatyldy. Onlaın rejımde 36 eń joǵary deńgeıli muǵalim sabaq beretin jobany bastap kettik. Biz aýyldaǵy muǵalimderdi qysqartqan joqpyz», - dedi oblys ákimi.
Osy oraıda ol atalǵan joba aıasynda sol aýyldaǵy muǵalimniń ózi joǵary deńgeıli ustazdardyń sabaǵyn balalarmen birge tyńdap, óz deńgeıin kóteretinin aıtty.
«Ony nege engizdik? Sebebi, búginde aýyldaǵy balalardyń bilim deńgeıi qaladaǵy bilim deńgeıinen 15%-ǵa tómen. Sondyqtan osy másele óte mańyzdy. Jobany 5 pán boıynsha engizdik: matematıka, fızıka, hımııa, bıologııa jáne aǵylshyn sabaqtary boıynsha. Osylaısha, kadr máselesi sheshildi», - E. Toǵjanov.