Aqtóbe oblysynyń 6 aýdanynda janýarlarǵa arnalǵan panajaı salynady

ASTANA. QazAqparat – Aqtóbe oblysynyń ákimi Eraly Toǵjanov ortalyq kommýnıkatsııalar qyzmetinde ótken brıfıngide óńirde buralqy ıtterdiń máselesi qalaı sheshiletinin aıtty, dep habarlaıdy QazAqparat tilshisi.

«Bizdiń oblysta 1700 shamasynda buralqy ıt bar. Onyń 1100-den astamy sterıldep, pishtirilgen. Aýdandarda veterınarlyq stansalar men janýarlarǵa arnalǵan panajaılar jumys isteıdi. Alty aýdanda osyndaı panajaı salý josparlanǵan», - dedi oblys ákimi.

Sondaı-aq, ol ıesiz janýarlarǵa qamqorlyq kórsetý turǵyndardyń qaýipsizdigine nuqsan keltirmeýi kerektigin atap ótti.

«Biz qazir buralqy ıtterge chıp salý máselesin pysyqtap jatyrmyz. «Tańba» atty aqparat júıesi ázirlendi. Bul baǵyttaǵy jumystyń bári sonyń aıasynda júrgiziledi. Árıne, azamattarymyzdyń qaýipsizdigi – eń mańyzdy másele. Sondyqtan qosymsha sharalar qabyldanady», - dedi ákim.