Aqtóbe oblysynyń 30 myńnan astam turǵyny bir mezette Ánurandy oryndady
Aqtóbede basty is-sharalar Ortalyq mádenıet jáne demalys saıabaǵynda ótti, onda Tý tuǵyry alańynda Memlekettik Gımndi bir mezette oryndaý boıynsha aktsııa uıymdastyryldy. Іs-sharaǵa ardagerler, depýtattar, qoǵamdyq keńes músheleri, úkimettik emes uıymdardyń, etnomádenı birlestikterdiń ókilderi, sportshylar, jalyndy jastar qatysty.
Oblys ákimi Eraly Toǵjanov 1992 jyldyń 4 maýsymy bizdiń tarıhymyzda jáne halqymyzdyń jadynda jańa memlekettik sımvolıkanyń dúnıege kelgen kúni retinde este qalatynyn atap ótti.
«Tý, Eltańba jáne Gımn — bizdiń memleketimizdiń kóp ǵasyrlyq tarıhynyń, jaýyngerlik jeńisteri men aýqymdy jetistikteriniń kórinisi. Olar qazaqstandyqtardyń kóptegen býyn urpaqtaryn biriktiredi jáne patrıotızmniń bastaýy, Otanǵa súıspenshilik, tarıh pen tilimizge, mádenıetimiz ben dástúrlerimizge tereń qurmet retinde qyzmet etedi. Bizdiń táýelsiz respýblıkamyzdyń basty qundylyǵy bola otyryp, memlekettik rámizder qazaq halqynyń biregeıligi men ózindik ereksheligin beıneleıdi. Olardy qadirleý — bizdiń árqaısymyzdyń qasıetti paryzymyz. Biz osylaısha óskeleń urpaq boıynda memlekettik rámizderdiń mańyzdylyǵy men máni týraly uǵymdy qalyptastyramyz, olardy patrıotızm men azamattyq sana-sezim rýhynda tárbıeleımiz», - dedi óz sózinde óńir basshysy.
Oblystyń barlyq aýdandarynda, A. Moldaǵulova atyndaǵy halyqaralyq áýejaıda, temirjol vokzalynda, iri saýda ortalyqtarynda, bazarlar men kásiporyndarda bir ýaqytta 30 myń adam Ánuran oryndady.
Sondaı-aq, Ortalyq saıabaqta «Meniń Qazaqstanym - Meniń Rámizderim» taqyrybynda kondıterlerdiń shyǵarmashylyq baıqaýy uıymdastyrylyp, oǵan 40 aspazshy patrıottyq taqyrypta óz ónimderin usyndy. Sýretshiler baıqaýyna qatysqan qylqalam sheberleri óz jumystaryn 50 metrlik kenep matada pash etti.
Jalpy, Memlekettik rámizder kúni óńirde 200-den astam mádenı-buqaralyq, sporttyq jáne basqa da is-sharalar ótti.