Aqtóbe oblysyndaǵy Joǵarǵy Yrǵyz ken ornynda qatty paıdaly qazbalar barlanbaq

ASTANA. QazAqparat – «Qazatomónerkásip» sırek kezdesetin metaldardyń jeke ken ornyn ıgerýdi josparlap otyr, dep habarlaıdy QazAqparat Ulttyq atom kompanııasynyń baspasóz qyzmetine silteme jasap.

Kompanııanyń enshiles uıymy – «Úlbi metallýrgııa zaýyty» AQ Aqtóbe oblysyndaǵy Joǵarǵy Yrǵyz ken ornynda qatty paıdaly qazbalardy barlaýǵa lıtsenzııa aldy. Sırek metaldardyń (tantal, nıobıı, berıllıı) qorlary men resýrstaryn baǵalaý jáne rastaý úshin kásiporyn ýchaskede jer qoınaýyn geologııalyq zertteý jumystaryn júrgizedi.

Joba atom holdıngine qoldanystaǵy óndiristi óziniń mıneraldy-shıkizat bazasymen qamtamasyz etýge, túpkilikti daıyn ónimniń ózindik qunyn tómendetýge, ekonomıkalyq tıimdilikti arttyrýǵa jáne jańa jumys oryndaryn ashýǵa múmkindik beredi.

Aıta ketsek, Ulttyq atom kompanııasynyń mol tájirıbesi men quzyrettilik deńgeıi bar, sondaı-aq joǵary tazalyqtaǵy sırek jáne sırek jer metaldaryn alý salasynda zamanaýı tehnologııalarǵa ıe. Úlbi metallýrgııa zaýyty – Qazaqstandaǵy biregeı kásiporyn jáne ýran, berıllıı, tantal men nıobıı ónimderin álemde tanylǵan óndirýshilerdiń biri.