Aqtóbe oblysynda jyl sońyna deıin 25 balabaqsha men 11 jańa mektep salý qajet - Smaıylov
Sapar barysynda Úkimet basshysy birqatar áleýmettik, ınfraqurylymdyq jáne óndiristik obektilerdiń qyzmetimen tanysady, aýyl sharýashylyǵy qurylymdarynyń basshylarymen kezdesedi, sondaı-aq oblysty keshendi damytý máseleleri jóninde keńes ótkizedi.
Óńirge kelgennen keıin Premer-Mınıstr aldymen 2021 jyldyń kúzinde jumys isteı bastaǵan, 1200 oqýshyǵa arnalǵan «Bilim» mektep-gımnazııasyna bardy.
QR Prezıdentiniń tapsyrmasyna sáıkes bilim salasyn damytý boıynsha júıeli sharalar qabyldanyp jatyr. Bıyl respýblıkalyq bıýdjetten mektepter salýǵa 104 mlrd teńge bólindi, elimizde myńnan astam mektepti, onyń ishinde Aqtóbe oblysynda 56 mektepti jańǵyrtý josparlanǵan.
«Óńirde 3 apatty jáne úsh aýysymmen oqytatyn 5 mektep bar. Sonymen qatar shamamen 12 myń bala balabaqsha kezeginde tur. Osy máselelerdi sheshý úshin jyldyń sońyna deıin 25 balabaqsha men 11 jańa mektep salý qajet», — dedi Álıhan Smaıylov.
Sondaı-aq Premer-Mınıstr óńir basshylyǵyna kolledjderde dýaldy oqytýdy damytýǵa nazar aýdaryp, túlekterdiń jumysqa ornalasýyna jaǵdaı jasaý qajet ekenin aıtty.
Odan keıin Úkimet basshysy 2021 jyly paıdalanýǵa berilgen 190 tósek-oryndyq jańa oblystyq perınataldyq ortalyqtyń qyzmetimen tanysty.
«Ótken jyldyń qorytyndysy boıynsha oblysta náresteler ólimi 29%-ǵa, qan aınalymy júıesi aýrýlarynan bolatyn ólim 47%-ǵa artqan. Ákimdik jańa perınataldyq ortalyqtyń múmkindikterin paıdalana otyryp, náreste ólimin azaıtý boıynsha sharalar qabyldaýy qajet. Sondaı-aq medıtsına kadrlarynyń tapshylyǵyn azaıtý boıynsha da júıeli jumys júrgizý kerek, bul úshin tıisti múmkindikter qarastyrylǵan», — dep atap ótti Álıhan Smaıylov.
Sonymen qatar Premer-Mınıstr jumys sapary barysynda óndiristik qýaty jylyna 70 myń tonna ónimdi quraıtyn «Bekturova» JK saýda-logıstıkalyq ortalyǵyna bardy.
Úkimet basshysy azyq-túlik baǵasynyń ósýiniń negizgi sebepteriniń biri maýsymaralyq kezeńde azyq-túliktiń jetispeýshiligi ekenin, sondyqtan saqtaý jáne logıstıka ortalyqtary baǵany turaqtandyrýdyń tıimdi quraly sanalatynyn atap ótti.
Sonymen qatar ol aýyl sharýashylyǵy ónimderin dúken sórelerine deıin deldalsyz jetkizýge múmkindik beredi.
«Osyndaı kóterme-taratý ortalyqtarynyń ashylýymen halyqty otandyq ónimdermen qamtamasyz etý jumystary aıtarlyqtaı jaqsarady. Bul baǵytta ákimdiktiń jumysy mańyzdy. Sondaı-aq oblys basshylyǵy aýyl sharýashylyǵy taýaryn óndirýshilermen ýaqytyly forvardtyq kelisimsharttar jasasyp, óndirýshiden tutynýshyǵa deıin satýdyń tıimdi tizbegin qalyptastyrýy qajet», — dep atap ótti Premer-Mınıstr.