Aqtóbe oblysynda jolaýshylar poıyzy lokomotıvpen soǵylyp relsten shyǵyp ketti

AQTÓBE. QazAqparat – Aqtóbe oblysynda jolaýshylar poıyzy relsten shyǵyp ketti, dep habarlaıdy QazAqparat tilshisi TJD silteme jasap.

«Búgin 5 naýryz kúni saǵat 10.30-da Aqtóbe oblysy, Shalqar aýdany, Bershúgir t/j stantsııasynda aldyn ala málimetter boıynsha jolaýshylar poıyzy manevrlik lokomotıvpen soǵylǵan. Saldarynan «Bishkek-Samara» baǵytymen júretin № 317 jolaýshylar poıyzynyń teplovozy, № 1 vagony jáne № 2 jolaýshylar poıyzynyń úsh dońǵalaqty juby relsten shyǵyp ketti. Oqıǵa ornyna Qazavıaqutqarý tikushaǵy ushyp shyǵyp, qutqarý bólimsheleri jiberildi jáne QTJ qalpyna keltirý poıyzy jóneltildi», - delingen departament habarlamasynda.

Aldyn ala málimet boıynsha relisten shyǵyp ketken poıyzda 200-den astam adam bolǵan (Qyrǵyzstan, RF jáne Qazaqstan azamattary, QTJ qyzmetkerleri). Jolaýshylar zardap shekpegen, olar poıyzdyń basqa vagondaryna ornalastyryldy.

Apatqa qatysty jedel shtab quryldy. Oqıǵanyń sebebi anyqtalýda.

Eske salsaq, dál osy Shalqar aýdanynda kámeletke tolmaǵan bala Toyota Land Cruiser avtokóliginiń rýline ıe bola almaı, aýdaryldy. Saldarynan bir qyz oqıǵa ornynda qaza bolyp, al tórteýi aýrýhanaǵa tústi. Aqtóbe oblystyq densaýlyq saqtaý basqarmasy basshysynyń orynbasary Bekbolat Іzbasarovtyń aıtýynsha, 2007 jyly týǵan qyz aýrýhanaǵa es-túzsiz jetkizildi. Ol ashyq bas-mı jaraqatyn alǵan. Mıyna qan quıylǵan. Dáriger jaǵdaıy óte aýyr dep otyr.