Aqtóbe oblysynda sý tasqynynan zardap shekkender úshin salynatyn úılerdiń qazyǵy qaǵyldy

AQTÓBE. QazAqparat – Aqtóbe oblysynyń Qobda aýdanynda sý tasqynynan zardap shekkender úshin salynatyn úılerdiń qazyǵy qaǵyldy, dep habarlaıdy QazAqparat aımaq basshysynyń baspasóz qyzmetine silteme jasap.

Jańa úıler Qobda aýylynyń «Jańaqonys» shaǵyn aýdanynda boı kóteredi. Barlyq ınfraqurylym bar, kógildir otyn, aýyz sý, elektr jelisi tartylǵan. Úıler bıylǵy 1 maýsymda paıdalanýǵa beriledi dep josparlanyp otyr.

«Qobda aýylynda bolǵan tabıǵı apatqa qaramastan, biz birligimiz, yntymaǵymyzdy kórsetip, úlken isti bastaǵaly otyrmyz. Mine, búgin Naýryz meıramynda úılerdiń qazyǵy qaǵyldy. Qurylys barysynda ózderińizben birge bolamyn. Kóp sozbaı, eki aıdyń ishinde qurylysty bitiremiz. Osyndaı iste bir-birimizdi demesek, elimiz turaqty damıdy», - dedi Aqtóbe oblysynyń ákimi Eraly Toǵjanov.

Qurylysy bastalǵan 24 úı tótenshe jaǵdaıǵa qarastyrylǵan bıýdjetke salynady. Qurylys josparyn kórgen aýyl turǵyndary da pikir bildirdi.

«Qıyn kúnderdi basymyzdan ótkerdik. 20 jyl Qobda aýylynda tursam da, birinshi ret sý tasqynyn kórdim. Úıim jaramsyz bolyp qaldy. Úıdi osy «Jańaqonys» shaǵyn aýdanynan salamyz degende qýandym. Óıtkeni, gaz, sý, jaryǵy tartylǵan. Úıdiń josparyn kórdim. Óte keń, ádemi bolady dep oılaımyn. Qonystanǵan soń, qojalyq ashyp, mal baǵýdy oılap otyrmyn», - dedi aýyl turǵyny Jańabaı Sháripuly.

Aýmaǵy 100 sharshy metrlik, bir tıpti úılerdiń qurylysymen bes merdiger aınalysady. Oblys ákimi qurylys kompanııalary ár úıdiń sapaly bolýyna bar kúshterin salatynyna, belgilengen merzimde ony paıdalanýǵa beretinine senim bildirdi.

Sondaı-aq, sharýa qojalyqtarynyń ıeleri de úı turǵyzýǵa yntaly. Máselen, «Báıterek» jáne «Altyn dala» sharýa qojalyqtary aýyldaǵy jas maman – veterınardyń baspanasyn salýǵa kómektesedi. Mundaǵy maqsat – aýylda jas mamandardyń qalýyna sep bolý, jaǵdaı jasaý.

Jalpy, Qobda aýylynda aýdan ákimi B. Qulovtyń sheshimimen jarııalanǵan tótenshe jaǵdaı rejımi áli de saqtalyp otyr.

Aıta ketsek, sý tasqyny kezeńinde Qobda aýylynda 78 úı, 22 aýla aýmaǵy erigen qar sýynyń astynda qaldy. Zalaldy baǵalaý jónindegi komıssııanyń aldyn ala málimetterine sáıkes, 7 úı qalpyna keltirilmeıdi, 4 úıdiń qabyrǵalary qulaǵan, olar apatty dep tanyldy, 13 úı sýda tur.