Aqtóbe oblysynda shalǵaı aýylǵa gaz tartyldy
Oblys ákimi Ońdasyn Orazalın Qobda aýylyna jumys sapary kezinde Jańatalap aýylyna gaz kelýine oraı ótken saltanatty sharaǵa qatysty.
«Bul aýdan úshin jáne jalpy Aqtóbe oblysy úshin mańyzdy ári aıtýly oqıǵa. Tipti shaǵyn aýyldardyń ózin gazdandyrý Memleket basshysynyń halyqtyń ómir súrý sapasyn jaqsartý jáne ál-aýqatyn arttyrý, aýyldyq aýmaqtardy damytý jónindegi tapsyrmalaryn oryndaý arqasynda múmkin boldy. Tabıǵı gazdyń kelýimen ómir jeńildep, aýyldyń damýyna jańa serpin beredi dep senemin. Jyl sońyna deıin oblysta taǵy eki eldi meken gazdandyrylady», - dedi oblys ákimi Ońdasyn Orazalın.
Uzyndyǵy 11 shaqyrymdy quraıtyn gaz qubyryn tartýǵa bıýdjetten 268,1 mıllıon teńge bólindi. 103 úı men úsh áleýmettik nysannyń turǵyndary tabıǵı gaz ótkizý múmkindigine ıe boldy.
Ońdasyn Orazalın Jańatalap turǵyndarymen áńgimelesti, keıin aýyldyń jańa sport alańyn aralap kórdi. Quny 7 mıllıon teńge bolatyn taǵy bir sport alańy Begaly aýylynda boı kótergen. Qarjy aýyldyq okrýg bıýdjetinen bólingen. Oblys ákimi eldi mekenge kiretin 1,7 shaqyrym joldy jóndeý jumystarymen tanysty. Merdiger jumysty qyrkúıek aıynda aıaqtaýdy josparlap otyr.
Aıta keteıik, Qobda aýdanynda bıyl aýdandyq mańyzy bar joldardy jóndeýge 1,2 mlrd teńge jiberildi. Bestaý, Begaly jáne Terisaqqan aýyldaryna kiretin jańa joldar salynyp, «I.Biltabanov- Qobda-Sarybulaq» jolynyń 13,8 shaqyrymy jóndeledi. Jumys kelesi jyly jalǵasady. Sonymen birge Qyzyljar, Jaryq, Sarybulaq jáne Ótek aýyldaryna kiretin joldardy jańartý josparlanǵan. Oblys ákimi jumysty jańa oqý jylynyń basyna qaraı aıaqtaýdy tapsyrdy.
«Balalar taza jaıaý jolmen júretin bolsyn»,- dep tapsyrdy Ońdasyn Orazalın.