Aqtóbe oblysynda shaǵyn jınaqty mektepterdi damytýǵa 4 mlrd teńgeden astam qarajat jumsalady
Óńirde «Tsıfrlyq tehnologııalardy qoldana otyryp, Aqtóbe oblysynyń shaǵyn jınaqty aýyldyq mektepteriniń áleýetin damytý» pılottyq jobasyn iske asyrý bastalady.
Aqtóbede ótken jobanyń tusaýkeserine oblys ákimi Eraly Toǵjanov, QR Oqý-aǵartý vıtse-mınıstri Aıbat Іlııasov, «Qazaqstan halqyna» qorynyń basshysy Bolat Jámishev, Qazaqstannyń eńbek sińirgen muǵalimi, qoǵam qaıratkeri Kúlásh Shámshıdınova, Aitas Foundation korporatıvtik qorynyń basshysy Ksenııa Verba, óńirdiń bilim basqarmasy ókilderi, ShJM dırektorlary, sondaı-aq ózge de seriktester qatysty.
Pılottyq joba óńirdegi 134 shaǵyn jınaqty mektepterde iske asyrylyp, muǵalimder tapshy shalǵaıdaǵy aýyldyq mektepterdi qamtıdy.
Jobany «Qazaqstan halqyna» qory, bilim berýdi turaqty damytý qory, QR Oqý-aǵartý mınıstrligi jáne Aqtóbe oblysynyń ákimdigi júzege asyryp jatyr.
Mundaǵy maqsat - shaǵyn jınaqty mektepterde tsıfrlyq sheshimderdi engizý arqyly bilim berý sapasy men oqytý tıimdiligin arttyrý, materıaldyq-tehnıkalyq bazany nyǵaıtý, pedagogterdi kásibı damytý.
Eraly Toǵjanov bul joba aýyldyq jerlerde orta bilim berý sapasyn odan ári arttyryp, oqýshylardyń turǵylyqty jerine qaramastan bilim alý úshin teń múmkindikterdi qamtamasyz etýde mańyzdy qadam ekenin alǵa tartty.
«Memleket basshysynyń qoldaýymen elimizde balalardyń jan-jaqty damýy men sapaly bilim alýyna barlyq jaǵdaı jasalǵan. Degenmen, qalalyq jáne aýyldyq mektepter arasyndaǵy bilim alshaqtyǵyna áser etetin faktorlar da bar. Osy máselelerdi sheshý úshin bizde birqatar sharalar júzege asyrylýda. Biz aýyldyq jáne qalalyq mektepter arasyndaǵy bilim deńgeıindegi alshaqtyqty joıý maqsatynda shaǵyn jınaqty mektepterdi qoldaýǵa baǵyttalǵan «BІLІM ALL» óńirlik jobasyn alǵash bolyp iske qostyq. Búginde joba tıimdiligin dáleldedi. Biz budan ári de osy baǵytta jumys isteýge nıettimiz», - dep atap ótti Eraly Toǵjanov.
Statıstıkalyq málimetterge sáıkes, 404 jalpy bilim beretin mekteptiń 72,5%-y aýyldyq jerlerde ornalasqan, onyń 204-i - shaǵyn jınaqtalǵan mektepter.
Pılottyq joba 10,5 myń oqýshyny qamtıtyn 134 shaǵyn jınaqty mektepte engiziledi.
Mektepter onlaın formatta oqytý úshin jańartylǵan tsıfrlyq kabınettermen jáne zerthanalyq jumystardy júrgizý úshin ǵylym kabınetterimen jabdyqtalady.
Kúlásh Shámshıdınovanyń sózinshe, joba aıasynda mektepterdi damytýdyń 4 modeli iske asyrylady, onyń ishinde strımıng, onlaın oqytý, tirek jáne magnıttik mektepter keshenin qurý, sondaı-aq tsıfrlyq sheshimderdi paıdalaný bar.
Árbir model tıimdilik pen kemshilikterdi anyqtaý úshin synaqtan ótkiziledi, qorytyndysynda jobany jaqsartý jáne odan ári aýqymyn keńeıtý týraly usynystar beriledi.
Jobanyń jalpy bıýdjeti 4 mlrd teńgeden astam, onyń ishinde «Qazaqstan halqyna» qory shaǵyn jınaqty mektepterdi jaraqtandyrýǵa 2 mlrd teńgeden asa qarajat bóledi.
«Qor bilim berý jobalaryna qatysa otyryp, balalardyń sapaly bilim alýyna jaǵdaı jasaýǵa ınvestıtsııa salýda. Qaıyrymdylyq degenimiz bul - densaýlyq saqtaý jáne áleýmettik qoldaý máseleleri ǵana emes, sonymen qatar bilim berý, mádenıet jáne sport salalaryndaǵy kúrdeli máselelerdi júıeli sheshýge qatysý. Biz turǵylyqty jerine qaramastan, árbir bala bilim alý úshin teń múmkindikterge ıe bolýy tıis dep sanaımyz», – dep atap ótti «Qazaqstan halqyna» qorynyń Basqarma tóraǵasy Bolat Jámishev.
Aıta ketý kerek, joba kóptegen seriktes men qatysýshylardyń basyn biriktirdi.
Bilim berýdi turaqty damytý qory operator retinde jumysty úılestirý máselesine jaýapty. Bul qordy AITAS agroónerkásip holdıngi qarjylandyrady.
«Aýyldyq aýmaqtardy damytýmen aınalysa otyryp, bilim berý salasynsyz aýyl turǵyndarynyń áleýetin ashý múmkin emes ekeni belgili boldy. Sapaly bilim qalalar men aýyldyq jerlerdiń turǵyndary úshin qoljetimdi bolýy kerek. Búgingi tańda bilim berý jobalarymyz óz jalǵasyn tabýda. Shaǵyn jınaqtalǵan mektepterdiń oqýshylary eń ozyq tehnologııalarmen jabdyqtalǵan kabınetterde oqyp, sapaly bilim ala alady, al biz balalar men aýyl turǵyndary úshin qoljetimdi sapaly bilim berý arqyly Qazaqstandy ornyqty damytý jónindegi úlken maqsatymyzǵa jaqyndaı túsemiz», - dedi Aitas Foundation korporatıvtik qorynyń dırektory Ksenııa Verba.
Pedagogterdiń ádisnamasy men biliktiligin arttyrý máseleleri Oqý-aǵartý mınıstrliginiń vedomstvolyq baǵynysty uıymdarymen qamtamasyz etiledi.
Sonymen qatar, jobany synaqtan ótkizý jáne tabysty iske asyrý úshin Online mektep, Daryn online, Roqed science, Aman Sultan, Kundelik sııaqty Qazaqstannyń úzdik bilim berý platformalary jobaǵa qatysýshy mektepterge óz resýrstaryn tegin bergen.
Jobanyń bastamashylary ony iske asyrý tirek jáne magnıttik mektepter máselelerine qatysty normatıvtik-quqyqtyq aktilerdi jetildirý, pedagogıkalyq jáne ádistemelik usynystardy ázirleý boıynsha usynystar daıyndaýǵa, sondaı-aq Qazaqstannyń basqa óńirlerinde jobanyń aýqymyn keńeıtý úshin úlgi bolatynyna senimdi.
Jıyn barysynda taraptar arasyndaǵy yntymaqtastyqty nyǵaıtý jáne tsıfrlyq tehnologııalardy paıdalana otyryp, Aqtóbe oblysynyń shaǵyn jınaqty aýyldyq mektepteriniń áleýetin damytý jónindegi birlesken qaıyrymdylyq jobasyn iske asyrý úshin Aqtóbe oblysynyń ákimdigi, QR Oqý-aǵartý mınıstrligi, «Qazaqstan halqyna» QQ jáne «Bilim berýdi turaqty damytý qory» QQ arasynda yntymaqtastyq týraly memorandýmǵa qol qoıyldy.