Aqtóbe oblysynda oqýshylar mingen taksı jol apatyna ushyrady

AQTÓBE. QazAqparat – Aqtóbe oblysy, Baıǵanın aýdanynyń ortalyǵy Qaraýylkeldide eki kólik soqtyǵysty. Olardyń birinde bolǵan 5 oqýshynyń biri aýrýhanaǵa tústi, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, oqıǵa búgin saǵat 09:50-de bolǵan.
«Qaraýylkeldi aýylyndaǵy Á. Moldaǵulova kóshesi boıynda»NIVA«men»Lada Prıora«avtokólikteri soqtyǵysty. Saldarynan kólik ishinde bolǵan qyzdyń «buǵanasyna zaqym keldi» degen dıagnoz qoıyldy. Derek aýdandyq polıtsııa bóliminde tirkeldi«, - dep habarlady oblystyq PD baspasóz qyzmetiniń jetekshisi Erbolat Sarqulov.
Aýdandyq aýrýhana mamandary balalardy qarap shyǵyp, 12 jasar qyzdy jedel járdem kóligimen oblys ortalyǵyna jibergen. Ol oblystyq balalar aýrýhanasynyń travmatologııa bólimine jatqyzyldy.

Bul jaıttan aýdan ákimdigi de habardar. Oqýshy qyzdardyń aýdan ortalyǵyna ne úshin kelgeni málim boldy.
»Negizi Noǵaıty aýylynda is-shara ótkizip jatyrmyz – ulandar sleti. Oǵan tańerteń avtobýspen balalar ketti. Janynda polıtsııa bar. Odan keıin osy habar keldi. Bilim salasyna jaýapty adamdardan mán-jaıdy suradym. Biz uıymdastyryp jatqan sharaǵa esh qatysy bolmaı shyqty.

Bes bala taksımen aýdan ortalyǵyna kelgen. Aýyl jaqyn. Shamamen 18 shaqyrym bolady. Qaraýylkeldidegi kóshe qıylysynda eki kólik soqtyǵysqan. Bes balany dárigerler qarady. Bári din aman. Bir qyzdyń buǵanasy jarylǵan, ony jedel járdem qalaǵa alyp ketken. Onyń jaǵdaıyn bilý úshin aýdandyq bilim bóliminiń basshysyn qalaǵa jiberdim. Jaǵdaıyn bildi. Din aman, aýrýhanadan shyqqan eken. Aýylǵa qaıtyp kele jatyr.

Negizi balalardyń janynda ata-analary bolmaǵan. Oqýshylardyń ózderi aýdan ortalyǵyna kelgen. Aýdan ortalyǵyndaǵy dúkennen ózderine qajetti kıim-keshek alýǵa shyqqan dep aıtty«,- dedi Baıǵanın aýdanynyń ákimi Qaırat Otarov.

Eske salsaq, buǵan deıin sporttyq jarysqa qatyspaq bolǵan balalar jol-kólik apatyna ushyrap, bir oqýshy kóz jumǵan edi. Al 8 bala aýrýhanada em qabyldady.