Aqtóbe oblysynda monsha men sulýlyq salondary jeksenbi kúni jumys isteıdi
Aqtóbe oblysynda kásipkerler qazir «Ashyq» pılottyq jobasyn qoldanysqa engizip jatyr. Mobıldik qosymsha keıbir nysannyń esh kedergisiz jumys isteýine múmkindik berdi. Máselen, fıtnes ortalyqtary, saýna, basseın, kompıýterlik klýbtar men boýlıng, kınoteatr, kontsert zaldary osy qatarda.
Oblystyq sanıtarııalyq-epıdemıologııalyq baqylaý departamenti baspasóz qyzmetiniń habarlaýynsha, balalardy saýyqtyrý lagerleri men mektepterdegi ashanalardyń jumysyna, sabaqtan tys ýaqytta oqýshylardy jeke oqytýǵa, aýyzashar berýge ruqsat joq. Sondaı-aq qala saıabaqtarynda, jaǵalaýlarynda jáne skverlerinde balalar men eresekterge arnalǵan elektromobılder, samokat, kartıng qyzmetin qoldanýǵa bolmaıdy. Al sporttyq jattyǵýǵa ruqsat berilgen. Tek 30 adamnan artyq jınalýǵa bolmaıdy.
«Kóshede tamaq satatyn arnaıy oryndardyń jumysyna ruqsat bar. Olar: tez daıyndalatyn tamaq ónimderin, ponchık, balmuzdaq, kókónis satý qyzmeti.
Sondaı- aq qoǵamdyq kólikte, taksı, áýejaı, temirjol vokzaldary men avtovokzaldarda, azyq-túlik jáne azyq-túlik emes bazarlarda, aıaldamada, úılerdiń kireberisinde sanıtarııalyq jáne dezınfektsııalyq óńdeý jumystaryn júrgizý kúsheıtilýi tıis.
Arnaıy, mamandandyrylǵan uıymdar, erekshe bilim berý qajettilikteri bar balalarǵa arnalǵan arnaıy mektep-ınternattar jabyq rejımde jumys isteýin jalǵastyrady. Joǵary oqý oryndarynyń I kýrs stýdentteri offlaın, kolledjderdiń I kýrs stýdentteri qashyqtan oqytý formatyna kóshedi.
Ashyq bazarlar (azyq-túlik, mal, azyq-túlik emes), caýna, SPA-ortalyq, basseın, jabyq bazarlar (azyq-túlik jáne azyq-túlik emes), jabyq sport obektileri (sport keshenderi, sport mektepteri, sport klýbtary, jattyǵý zaldary) jáne sporttyq-saýyqtyrý ortalyqtary, fıtnes klýbtar, sonyń ishinde ıoga ortalyqtary, saýda, oıyn-saýyq úıleri, saýda jelileri senbi-jeksenbi kúnderi jumysyn toqtatýy tıis», - dep jazylǵan qaýlyda.