Aqtóbe oblysynda qola dáýiriniń qorymy tabyldy

AQTÓBE. QazAqparat – Aqtóbeniń Yrǵyz aýdany, Sheńbertal aýyly mańyndaǵy qorymnan qola dáýirinde jerlengen adamdardyń súıegi tabyldy, dep habarlaıdy QazAqparat tilshisi. Sheńbertaldaǵy qorymdy aldymen aýyl adamdary taýyp alyp, habar bergen. Arheologtar qola dáýiriniń qorymyn taýyp, jedel habar bergen S.Moldabekov, E.Kóshpambetov jáne S.Qoblashevqa alǵysyn bildirdi.

«Qazan aıynyń 2-4 aralyǵynda Aqtóbe oblystyq tarıhı-ólketaný mýzeıiniń arheologııalyq toby Sheńbirtal-I qorymynda zertteý jumystary júrgizilgen bolatyn. Eskertkish Yrǵyz aýdany, Sheńbirtal aýylynan soltústikke qaraı 300 metr jerdegi ózenniń sol jaq bóliginde ornalasqan. Tas dáýiriniń eskertkishi bar ekenin ótken ǵasyrdyń ekinshi jartysynda arheolog A.A.Formozov ashqan edi. Qabirdiń betki jaǵy sheńber, sopaqsha jáne pishini ártúrli tasty dýaldardan salynǵan. Dýaldar kóbinese jerge tiginen kómilgen tastarmen jáne bir-birimen baılanysy joq qumtastarmen qorshalǵan», - dep habarlady Aqtóbe oblystyq tarıhı-

ólketaný mýzeıiniń arheologııalyq toby.

Aıta keteıik, arheologııalyq zerttteý kezinde eki adamnyń qabiri qazyldy. Adam oń jaqqa qaraı jantaıyp jatqan jáne qolymen betin basqan keıipte jergengen.

«Bas súıek jaǵynda oıýlanǵan eki keramıkalyq qumyra tabyldy. Sonymen qatar qoladan jasalǵan bilezikter, syrǵalar jáne oraq pishindi zattar shyqty. Bastapqy zertteýlerdiń sheshimi boıynsha eki qabirde de áıel adam jerlengen. Qorym qola dáýiri merzimine jatatyny anyqtalyp otyr. Qazirgi kezde Sheńbirtal-I qorymy apattyq jaǵdaıda bolǵandyqtan jedel qazba jumystaryn júrgizýdi talap etip otyr. Munda mýzeıdiń arheologııalyq toby, ıaǵnı, Nursultan Baırov, Nurshat Orazmaǵambetov, Baýbek Melısov júr», - dep habarlady oblystyq mýzeıdiń ǵylymı qyzmetkeri Meıram Dúısenǵalı.