Aqtóbe oblysynda iri qaranyń qyrylýyna ýly aramshóp sebep bolǵan - AShM
«Keshe keıbir Feısbýk qoldanýshylary Aqtóbe oblysynda qaıdaǵy bir belgisiz aýrýdyń saldarynan kóp sıyrdyń jappaı qyrylǵany, ol aýrýdyń áli de taralatyny týraly aqparatty tarata bastady. Bunyń bári shyndyqqa sáıkes kelmeıdi. Vıdeonyń astyna men sharýashylyq ıesiniń akkaýntynyń siltemesin qaldyramyn. Ol (fermer - avt.) fýrajırdiń (mal azyǵyna jaýapty adam - S.Qalqamanovtyń túsindirýi) qaraýynsyz iri-qaralarǵa kádimgi aqmııa berilip qoıǵandyqtan, sıyrdy eriksiz soıýǵa týra kelgenin aıtady. Bul - óte qaýipti aramshóp. Ýıkıpedııadan aqtarsańyz, bul aramshóptiń burshaq tuqymdas ekenin bilýge bolady. Ol birden maldyń ýlanýyna ákep soǵady», - deıdi ol.
Mınıstrdiń keńesshisiniń aıtýynsha, osy sebepti maldy soıýǵa týra kelgen.
«Soıylǵannan keıin et tońazytqyshta saqtalyp, odan oblystyq veterınarlyq zerthanasynda synama alynǵan. Jaýapty qyzmetkerlerdiń buǵan eshqandaı da aýrýdyń qatysy joqtyǵy, maldyń ýlanǵany týraly qorytyndysy bar. Álbette, atalmysh fermerdiń - aýyl sharýashylyǵy taýaryn óndirýshiniń saly sýǵa ketip, jaǵdaıy qıyndaı túskeni anyq. Baqqan malyn joǵaltý ońaı emes. Qudaıǵa shúkir, maldyń saqtandyrylǵany belgili bolyp otyr», - deıdi ol.
Eske sala ketsek, Aqtóbe oblysy Hromtaý aýdany, Qopa aýylyndaǵy sharýa qojalyqtardyń birinde júzden asa iri-qaranyń kózi joıylǵany týraly jazǵan bolatynbyz.
Keıin Aqtóbe oblystyq veterınarııa basqarmasy Hromtaýdaǵy jaǵdaıǵa qatysty túsinikteme bergen bolatyn.