Aqtóbe oblysynda iri qaradan juqpaly aýrý anyqtalǵan qojalyqqa shekteý engiziledi

ASTANA. QazAqparat – Aqtóbe oblysy Alǵa aýdanyna qarasty Marjanbulaq aýylyndaǵy sharýa qojalyǵynda iri qaradan qarasan aýrýy anyqtaldy, dep habarlaıdy QazAqparat tilshisi.

«Alǵa aýdanynyń Marjanbulaq aýyldyq okrýginiń «Sarym» sharýa qojalyǵyndaǵy iri qara maldardyń arasynda qarasan juqpaly aýrýynyń anyqtalýyna baılanysty shekteý is-sharalary belgilensin», - delingen Ashyq NQA portalynda jarııalanǵan Marjanbulaq okrýginiń ákimi Meıirjan Asqarulynyń sheshim-jobasynda.

Málim bolǵandaı, 9 maýsym kúni atalǵan qojalyqtaǵy 1,5 jasar iri qaranyń óleksesin zertteý nátıjesinde odan qarasan anyqtalǵan.

«Marjanbulaq aýyldyq okrýginiń «Sarym» sharýa qojalyǵyndaǵy iri qara maldyń arasynda 1 bas erkek tóldiń óleksesi boıynsha qarasan aýrýyna kúdik keltirilip, odan synama alynyp, oblystyq veterınarııa zerthanasyna jiberildi. Onyń qorytyndysyna saı, iri qaradan alynǵan synama qarasan aýrýyna oń nátıje kórsetti. Qarasannyń qaýipti bakterıologııalyq juqpaly aýrý ekenin eskere otyryp, Marjanbulaq aýyldyq okrýginiń «Sarym» qojalyǵynyń aýmaǵyna shekteý is-sharalaryn engizýdi usynamyz», - delingen sheshimshge qosymsha berilgen túsindirmedi.

Qujat 26 maýsymǵa deıin kópshilik talqylaýda bolady.