Aqtóbe oblysynda Hromtaý qalasynan shyǵar joldarǵa jyljymaly beketter qoıylady

AQTÓBE. QazAqparat - Qazaqstan polıtsııasy kúnine oraı Hromtaýda polıtsııa qyzmetkeri baspanaly bolyp, aýdandyq bólimge kólik syıǵa berildi, dep habarlaıdy QazAqparat tilshisi.

Samara-Shymkent tasjoly boıynda ornalasqan Hromtaý aýdanynyń polıtsııa qyzmetkerleri úshin qysy-jazy jumys kóp. Qarbalas sátte shaqyrý ornyna jedel jetý, qylmystyń betin ashý, aldyn alý jumystaryna basymdyq beriledi.

Aýdan ákimi Azamat Beket saltanatty túrde aýdandyq polıtsııa bóliminiń ınspektory Erbol Álıevke páter kiltin tabystap, polıtsııa qyzmetkerlerin quttyqtady. Aýdan basshysy polıtsııa qyzmetkerleriniń qoǵamdyq tártipti qamtamasyz etý jáne aımaqtaǵy koronovırýs pandemııasynyń taralýyna qarsy kúres jumysyna qosqan eleýli úlesin atap ótti.

«Prezıdent Qasym-Jomart Toqaev jergilikti polıtsııa qyzmetiniń qadamdyq qoljetimdiligine kóshý týraly tapsyrma berdi. Aýdan ákimi Azamat Beket polıtsııaǵa avtokólik syılady. Bul kólikti biz kezekshi bólim qyzmetine beremiz. Sebebi aýdanda 28 myńnan astam halyq turady. Biz shuǵyl shaqyrýǵa 7 mınýtta jetýimiz kerek. Jańa tehnıka quqyqtyq tártipti qamtamasyz etýge, qylmysty boldyrmaýǵa septigin tıgizedi dep senemiz.

Sonymen birge jyljymaly statsıonarlyq beket qoldanysqa berildi. Іshinde arnaıy bólmeleri bar. Erler men áıelderge bólek tósek-oryn qarastyrylǵan. Qysta jylytylady, jazda salqyndatqysh qosalady. Samara-Shymkent tasjolynda ornalasqan Hromtaý úshin eń qajetti tehnıka. Qysta adamdar jıi jolda qalady. Jazda da kómek kórsetýge týra keledi. Sol sebepti jyljymaly beketti qalanyń eki shetine qoıýdy josparlap otyrmyz», - dedi Hromtaý polıtsııa bóliminiń bastyǵy Quralbek Sharbakov.

Sondaı-aq Hromtaý aýdany Kóktaý aýylynda ýchaskelik polıtsııa pýnktiniń saltanatty ashylýy ótti. Ýchaskelik polıtsııa pýnkti Kóktaý aýyldyq okrýgi ákimdiginiń jańa ǵımaratynda ornalasqan jáne qajetti kompıýterlik tehnıkamen, jıhazben jabdyqtalǵan.

Hromtaý polıtsııa bóliminiń bastyǵy Quralbek Sharbakov aýdan ákiminiń qoldaýynyń arqasynda bıyl polıtsııa qyzmetiniń tıimdiligin arttyrýǵa, vedomstvonyń materıaldyq-tehnıkalyq bazasyn nyǵaıtýǵa, sondaı-aq jeke quramnyń turǵyn úı-turmystyq jaǵdaıyn jaqsartýǵa baǵyttalǵan sharalar kesheni iske asyrylǵanyn atap ótti. Aýdan basshysyna kórsetken qoldaýy úshin alǵys aıtyp, polıtsııa aldyna qoıylǵan barlyq mindetterdiń oryndalatynyna sendirdi.

Saltanatty sharaǵa ishki ister organdarynyń ardagerleri men jergilikti atqarýshy organ ókilderi de qatysty.

«Pandemııa kezinde eki qyzmetker kóz jumdy. Búgin olardyń jesirlerine baryp, arnaıy quttyqtaýymyzdy arnadyq. Qyzmet barysynda kóz jumǵan qyzmetkerlerge arnalǵan eskertkishke gúl qoıdyq. Olar beıbit kúnniń batyrlary», - dedi Quralbek Sharbakov.

Aıta keteıik, aýdandyq polıtsııa bóliminde 121 qyzmetker bar. Er azamattarmen qatar áıelder de qatar qyzmet etip júr.