Aqtóbe oblysynda gaz zaýytyndaǵy órtke qatysty qylmystyq is qozǵaldy
Aqtóbe oblysynyń ákimi Eraly Toǵjanov Jańajol ken ornyna bardy. Onda jıyn ótkizip, tekserý júrgizýdi tapsyrdy.
«Órt sóndirildi, onyń saldaryn tekserý kerek. Qylmystyq isti tergeý kezinde árbir jumysshy qyzmetin tekserip, tujyrym jasalýy tıis. Bolashaqta mundaı jaǵdaı bolmas úshin jol kartasy jasalýy kerek», - dedi Eraly Toǵjanov.
Oqıǵa ornynda júrgen oblystyq Tótenshe jaǵdaılar departamentiniń bastyǵy Marǵulan Amanbaev mán-jaıdy taǵy bir ret baıandady.
«Semser» JShS-niń órt sóndirýshileri oqıǵa ornyna 3 mınýttyń ishinde jetti. Onyń ishinde 4 tehnıka, 20 adam. Olar órttiń shyǵý sebepterin anyqtamas buryn gıdranttarǵa kólikterdi qoıyp, olardy sýytý jumystaryn bastady. Oblystyq TJD-ǵa habar kelgennen keıin Muǵaljar, Temir aýdandary men Aqtóbe qalasynan tehnıka jiberildi. Ózimiz tikushaqpen saǵat 05:00-de ushyp keldik. Órt tańǵy saǵat 06:20-da tolyq sóndirildi. Qazir sebepteri anyqtalyp jatyr. Qylmystyq kodekstiń «Órt qaýipsizdigi talaptaryn buzý» baby boıynsha is qozǵaldy. Birinshiden, kúıik shalǵan adamdardyń saýyǵyp ketýin tileımiz. Solar arqyly órttiń shyǵý sebebi anyqtalady»,- dedi oblystyq TJD bastyǵy.
Aıta keteıik, Aqtóbe oblystyq densaýlyq saqtaý basqarmasynyń basshysy Rústem Isaevtiń habarlaýynsha, órt kezinde kúıik shalǵan tórt naýqas qazir Keńqııaq aýyldyq aýrýhanasynda em qabyldap jatyr. 32 jastaǵy M.Isaevtiń denesin, 52 jastaǵy M.Qýanshalıevtiń beti men ıyǵyn, 56 jastaǵy R.Rysbekovtiń denesin, 53 jastaǵy B.Qoıshenovtiń qolyn ekinshi jáne úshinshi dárejede kúıik shalǵan. Dárigerler olardy qalaǵa jetkizý jaıyn qarastyryp jatyr.