Aqtóbe oblysynda ekonomıka ósimi turaqty

ASTANA. QazAqparat - Búgin Ortalyq kommýnıkatsııalar qyzmetinde ótken baspasóz konferentsııasynda Aqtóbe oblysynyń ákimi Eraly Toǵjanov Memleket basshysynyń halyqtyń ál-aýqatyn arttyrý, memlekettik baǵdarlamalardy iske asyrý jónindegi tapsyrmalary, sondaı-aq 2023 jyldyń 4 aıynyń qorytyndysy boıynsha óńirdiń áleýmettik-ekonomıkalyq damýy aıasynda qabyldanyp jatqan sharalar týraly habarlady.

Spıker óńirde turaqty makroekonomıkalyq jaǵdaı saqtalatynyn atap ótti.

Naqty sektorda aýyl sharýashylyǵynda óndiris ósimi – 100,9%, ınvestıtsııa – 111,4%, qurylys jumystary - 115%, turǵyn úıdi paıdalanýǵa berý – 101,1%, kólik jáne qoımalaý - 113% qurady.

Óńirge ınvestıtsııa tartý jáne qolaıly ınvestıtsııalyq klımat qurý máselesi - basym baǵyttardyń biri bolyp qala beredi.

«Aǵymdaǵy jylǵy josparymyzda 1 trln teńgeden astam ınvestıtsııa tartý qarastyrylyp otyr. Sonymen birge, Memleket basshysynyń tapsyrmasyn oryndaý maqsatynda óńirde 2023-2025 jyldar aralyǵynda 7,3 myńnan astam jumys oryndaryn qurýǵa múmkindik beretin 2,8 trln teńgege 16 mańyzdy joba iske asyrylmaq»,- dep atap ótti Eraly Toǵjanov.

470 mlrd teńgege temirjol klasterin qurý josparlandy. Onyń aıasynda elimizde alǵash bolattyń arnaıy markalaryn shyǵaratyn kásiporyn boı kóteredi.

Zaýyt shet elderden jyl saıyn 1 mlrd dollarǵa satyp alynatyn arnaıy bolat daıyndamalaryn óndirýge jáne ımportty almastyrýǵa múmkindik beredi.

Sondaı-aq, Qazaqstanda 800 metrlik jiksiz rels shyǵaratyn alǵashqy kásiporyn («PZTM LTD» JShS, 21,4 mlrd teńge) jáne de Qazaqstannyń batys óńiri aýmaǵyna joǵary tehnologııalyq temir jol dóńgelekterin shyǵaratyn zaýyt («Aqtóbestıl» JShS 168 mlrd teńge) iske qosylady.

«Ekinshiden, óńirdiń ekologııalyq jaǵdaıyn jaqsartý úshin ERG kompanııasymen 1,1 trln. teńgeni quraıtyn jobalardy iske asyrý týraly memorandýmǵa qol qoıyldy. Mańyzdy qujatta 1973 jyldan bastap Dóń taý-ken baıytý kombınatynda jınalǵan shlamdardy qaıta óńdeý, oblystyń energetıkalyq qaýipsizdigin qamtamasyz ete alatyn jalpy qýattylyǵy 250 MVt bolatyn ýtılızatsııalyq jaratý stantsııasy jáne jel elektr qondyrǵysyn salý qarastyrylǵan. Sondaı-aq, kompanııa «Qazaqstan táýelsizdiginiń 10 jyldyǵy» shahtasynyń ekinshi kezeńi iske asyrylmaq»,- dedi Eraly Toǵjanov.

Medıtsına salasyn damytý maqsatynda 30 mlrd teńgege birqatar jobalar júzege asyp jatyr.

Atap aıtqanda, ıadrolyq medıtsına ortalyǵy, medıtsınalyq buıymdar shyǵaratyn fabrıka jáne TMD elder arasynda alǵash ret dıalızator shyǵaratyn zaýyt salynady.

Investıtsııalar týraly aıta kele, Eraly Toǵjanov «Qazaqstandyq munaı jabdyqtar zaýyty» kompanııasy ishki naryqty munaı jabdyqtarymen qamtamasyz etý úshin mobıldi burǵylaý qondyrǵylary jáne fontandyq armatýra shyǵaratyn Qazaqstandaǵy alǵashqy zaýytty paıdalanýǵa beredi.

«Ózderińiz biletindeı, elimizde bıtým tapshylyǵy – kún tártibinde. Osyǵan baılanysty óńirde «Batys Bıtým» JShS bıtým zaýytynyń qurylysy boıynsha joba iske asyryla bastady. Zaýyttyń qýattylyǵy jylyna 700 myń tonnany quraıdy. Bul degenimiz zaýyt ónimderi tek Aqtóbe oblysy ǵana emes, elimizdiń batys óńirleriniń qajettiligin jabýǵa tolyq múmkindik beredi»,- dep atap ótti spıker.

Eraly Toǵjanov sondaı-aq, qurylys jumystarynyń qunyn tómendetýge yqpal etetin tsement zaýytyn salý josparlanyp otyrǵanyn aıtyp ótti.

Sonymen qatar, qurylysta jylý únemdeıtin materıaldar óndirisin ashý boıynsha jumys bastaldy, onda shıkizat retinde óńirdiń jeke qosalqy sharýashylyqtarynan satyp alynatyn qoı júni paıdalanylady.