Aqtóbe oblysynda bıyl 300 shaqyrym jol jóndeledi
Aqtóbe oblystyq Jolaýshylar tasymaly jáne avtomobıl joldary basqarmasynyń basshysy Málimbet Ibrashov búgin Óńirlik kommýnıkatsııalar qyzmetinde osy jyldyń josparymen bólisti.
«Bıyl oblystyq jáne aýdandyq mańyzy bar joldardy jóndeý jalǵasady. Barlyǵy 300 shaqyrym jol qalpyny keltiriledi. Jol jóndeý kezinde «Aýyl - el besigi» jobasynyń múmkindigin keń qoldanamyz», - dedi Málimbet Ibrashov.
Óńir úshin «Aqtóbe-Atyraý» tasjolynyń Aqtóbe-Qandyaǵash qalalary arasyndaǵy bóligi eń mańyzdy. Eki aralyq – 89 shaqyrym. Jol salý jumystaryna 2 merdiger mekeme tartyldy. Qazirgi ýaqytta baıqaý ótip, qurylysshylar qajetti materıaldy jetkizýdi bastady.
«Joba quny – 60 mıllıard teńge. Qazir daıyndyq bastaldy. Osy jyldyń sáýir aıynda qurylys júrgiziledi. Jol 4 jolaqty bolady. Eki jolaqtan soń qorshaý qoıylyp, qarsy betke shyǵýdy shekteıdi. Barlyǵy 9 ótkel men jolaıryq bolady. Qurylys 2023 jyldyń qarasha aıynda aıaqtalady», - dedi «Qazavtojol» UK»AQ oblystyq fılıal dırektorynyń orynbasary Qazybek Mambetov.