Aqtóbe oblysynda birneshe aýylǵa gaz berildi
Eldi mekenderge gaz berý «Óńirlerdi damytý» baǵdarlamasy aıasynda iske asyryldy. Jalpy uzyndyǵy 78,6 shaqyrymdyq aýylaralyq gaz qubyrlarynyń qurylysyna 750 mln teńgeden astam qarjy jumsaldy.
«Qysta birneshe tonna kómir jaǵyp keldik. Bul otbasylyq bıýdjetke edáýir salmaq túsirdi. Kún saıyn ot jaǵý da qıyn. Gazdyń kirgenine óte qýanyshtymyz jáne oblys basshylyǵyna osylaı qoldaý kórsetkeni úshin alǵysymyz sheksiz»,- dedi Tasótkel aýylynyń turǵyny Svetlana Saǵyrova.
Ońdasyn Orazalın aýyl turǵyndaryn quttyqtap, jumysshylarǵa jumysty belgilengen ýaqytynda oryndaǵandary úshin alǵysyn aıtty.
«Memleket basshysynyń tapsyrmasymen aýyl-aımaqtardy damytý, aýyldarda qolaıly jaǵdaı jasaý jumystary jalǵasatyn bolady»,- dedi oblys ákimi Ońdasyn Orazalın.
Aıta keteıik, qazirgi tańda Hromtaý aýdanynyń 99% gazben qamtylǵan.
Sondaı-aq Áıteke bı aýdanyndaǵy Araltoǵaı aýylyna da gaz berildi. Barlyǵy 23,5 shaqyrymdyq gaz qubyryna 299 mln teńge jumsaldy. Aýyldaǵy 230 úı men 4 áleýmettik nysanǵa kógildir otyn kiredi.
«Gazdy biz aldymen damý keleshegi bar, týý jaǵynan da, kóshi-qon jaǵynan da dınamıkasy jaqsy iri eldi mekenderge júrgizýge tyrysamyz. Ádette bul - sharýamen aınalysý úshin sýy bar, jaǵdaıy jasalǵan, úlken joldyń boıynda ornalasqan eldi mekender. Sony eskersek, bizde perspektıvti jospar bar. Gaz qubyryn júrgizý - bir kúndik jumys emes ekeni túsinikti, ol úshin memlekettik saraptama júrgizýdi eseptegende keminde bir jyl ketetin jobalyq-izdenis jumystary, jobalyq-smetalyq qujattama daıyndaý kerek. Qýanyshqa oraı Úkimet bizdi bul bastamada belsendi qoldaıdy jáne sońǵy kezde biz jyl saıyn keminde 15-16 aýyldy gazben qamtyp otyrmyz. Bıyl 14 aýylǵa gaz kirgizemiz dep josparlaǵanbyz, biraq 16 aýyldy qamtydyq»,- dedi Ońdasyn Orazalın.