Aqtóbe oblysynda balalar úıleriniń tárbıelenýshileri jumyspen tolyq qamtylady
Bıyl Aqtóbe oblysynda balalar úıleri tárbıelenýshileriniń 69-y qoldaryna dıplom alady. Qudaıbergen Jubanov atyndaǵy Aqtóbe óńirlik memlekettik ýnıversıteti men Saqtaǵan Báıishev atyndaǵy ýnıversıtetti 15 stýdent bitiredi. Al arnaýly orta oqý oryndarynda 54 túlek bar. Barlyǵyn jumysqa ornalastyrý úshin qazir iri kompanııalarmen kelissózder júrip jatyr. Olardyń arasynda Aqtóbe hrom qosyndylary zaýyty, Aqtóbe ferroqorytpa zaýyty men Dóń ken baıytý kombınaty bar.
«Hromtaý aýdanynda bilim alyp jatqan stýdentterdi aldaǵy ýaqytta ken ornyna jumysqa ornalastyrǵymyz keledi. Sonymen qatar, balalar úıiniń tárbıelenýshileri Alǵa, Muǵaljar, Mártók aýdandarynda oqyp júr. Olardyń kóbi tehnıkalyq mamandyqty meńgergen. Al joǵary oqý oryndarynyń túlekteri pedagogıkalyq mamandyqtyń ıesi bolyp shyǵady. Jumysqa ornalastyrý kezinde túlekterdiń jalaqysyna basa nazar aýdarylady. Sebebi, balalar úıinen shyqqandardyń kóbi páter jaldap turýǵa májbúr. Olardyń tabysy páterge, azyq-túlik pen kıimge, kúndelikti jol qatynasyna jetýi tıis»,- dedi «Jas Otan» jastar qanaty oblystyq fılıalynyń tóraǵasy Asyljan Búrkitalın.
«Nur Otan» partııasynyń «Sátti qadam» baǵdarlamasy aıasynda iri óndiris oryndarymen qatar shaǵyn jáne orta bıznes nysandarymen arada kelisim júrgiziledi. Іri óndiris oryndarymen aradaǵy kelisimdi «Jas Otan» jastar qanaty qolǵa alsa, shashtaraz, azpaz sekildi mamandyqtardy ıgergen túlekter qalalyq jumyspen qamtý jáne áleýmettik baǵdarlamalar bólimi arqyly eńbekke aralasady.
Aıta keteıik, jumys berýshiler «balalar úıiniń tárbıelenýshileri durys jumys isteı almaıdy» degen qasań oıdan arylmaǵan. «Jasotandyqtar» jas mamandarǵa kepil bolyp, ótken jyly eńbekke aralasqandardyń barlyǵy tabysty jumys istep júrgenin mysalǵa keltirgen.