Aqtóbe oblysynda aýyldasyn sýıtsıdten qutqarǵan ákim marapattaldy
Oqıǵa 1 maýsym kúni tús ýaqytynda boldy. Saǵat 14:30-da Qaratoǵaı aýylynyń turǵyny baılanys munarasyna shyǵyp, ózine-ózi qol salýǵa oqtalyp turǵany týraly aqparat Mártók aýdanynyń №15 órt sóndirý bólimine tústi. Shaqyrý ornyna Mártók aýdanynyń tótenshe jaǵdaı bólimi, Aqtóbe oblysy Tótenshe jaǵdaılar departamenti órt sóndirý jáne avarııalyq qutqarý jumystary qyzmeti jedel-qutqarý jasaǵynyń qutqarýshylary, medıtsına mamandary jáne polıtseıler jiberildi.
Turǵyndy áńgimege tartý úshin munaraǵa aýyl ákimi Rýslan Baısaǵyzov shyqqan.
«Shaqyrý ornyna barǵan kezde Qaratoǵaı aýyly turǵynynyń bıiktigi 25 metrlik munaraǵa shyǵyp alǵany belgili boldy. Ol ózine-ózi qol salmaq boldy. Týystarymen, onyń ishinde ákesi, jubaıy, qyzy jáne qyzmetkerlermen sóılesti. Biraq nátıje bolmaı, ol aýyldyq okrýg ákimi Rýslan Baısaǵyzovpen sóılesetinin málimdedi. Keıin ákimmen baılanysqa shyqty. Sol sátte qutqarýshylar er adamǵa jaqyndaý úshin joǵary kóterile bastady. Al saǵat 17:17-de qutqarýshylar er adamdy kisenmen qutqarý konstrýktsııasyna bekitip, aman-esen tómenge túsirdi. Oǵan psıhologııalyq kómek kórsetilip, ári qaraı ýchaskelik ınspektorǵa tapsyryldy», - dedi oblystyq Tótenshe jaǵdaılar departamentiniń baspasóz qyzmetinen.
Osy oqıǵadan keıin turǵyndy aman-esen alyp qalǵan aýyl ákimi R.Baısaǵyzovty QR Memlekettik qyzmet isteri agenttiginiń tóraǵasy Darhan Jazyqbaev marapattady.
«Qaratoǵaı aýylyna ákim bolyp júrgenime úshinshi jyl boldy. Mundaı jaǵdaı birinshi ret tirkelip otyr. Munaraǵa shyǵyp ketken aýyl turǵyny bir jarym jyl buryn kóship kelgen edi. Oqıǵany estigende oılanatyn, qorqatyn ýaqyt bolmady. Birden bardym. Munaraǵa birinshi ret shyǵyp turmyn. Qutqarýshylardyń kásibıliginiń arqasynda adamdy aman alyp qaldyq», - dedi aýyl ákimi Rýslan Baısaǵyzov.