Aqtóbe oblysynda apatqa ushyraǵan Bishkek-Samara poıyzy jolǵa qaıta shyqty

AQTÓBE. QazAqparat – Aqtóbeniń Birshoǵyr beketinde relsten shyǵyp ketken jolaýshylar poıyzy jóndeý jumystarynan soń qaıta qalpyna keltirildi. Poıyz Samaraǵa qaraı baǵyt aldy, dep habarlaıdy QazAqparat tilshisi.

Búgin Aqtóbe oblysy Shalqar aýdany Bershúgir stansasynda jolaýshylar poıyzy men manevr teplovozy soqtyǵysqan bolatyn. Tańǵy saǵat 10:20-da toqtaǵan poıyz qaıta jolǵa shyqty. Aqtóbe oblysy ákimi baspasóz qyzmetiniń habarlaýynsha, Bishkek-Samara baǵytyndaǵy poıyz saǵat 16:00-den keıin attandy.

«Atalǵan oqıǵa Qandyaǵash stansasyndaǵy Jelilik polıtsııa bóliminiń sotqa deıingi tergep-tekserý biryńǵaı reestrine alyndy. Іs Qylmystyq Kodekstiń 344-baby 1-bóligimen qozǵaldy, ıaǵnı temirjol kóligi júrisi nemese olardy paıdalaný qaýipsizdigi qaǵıdalaryn buzý boıynsha tirkeldi», - dep habarlady Kóliktegi PD baspasóz qyzmeti.

Eske salsaq, Aqtóbe oblysy ákimi baspasóz qyzmetiniń habarlaýynsha, aımaq basshysy Eraly Toǵjanov temirjoldaǵy apattan keıingi jaǵdaıdy baqylaýyna alyp, jolaýshylarǵa kómek kórsetýdi tapsyrdy.

«Olarǵa ystyq tamaq jetkizildi. Dárigerler de jolaýshylardy qarap shyqty. Eshkim zardap shekken joq. Oqıǵa ornyna jóndeý, qalpyna keltirý jumystaryn atqaratyn poıyz jetti. TJD men «Qazaqstan temir joly» UQ» AQ qyzmetkerleri birlesip jumys istep jatyr. Apattyń sebebin arnaıy komıssııa anyqtaıdy», - dep habarlady oblys ákiminiń baspasóz qyzmeti.