Aqtóbe oblysynda aqtútek boranda jolda qalǵandar qutqarylyp jatyr

AQTÓBE. QazAqparat – Aqtóbe oblysynda aqtútek boran basylmaı tur. Oblystyq Tótenshe jaǵdaılar departamentiniń qutqarýshylary jolda qalǵan adamdarǵa, medıtsınalyq kómekke muqtaj jandarǵa qolushyn sozyp jatyr, dep habarlaıdy QazAqparat tilshisi.

Qazir Aqtóbe oblysynda borannan birneshe baǵytta jol jabyq tur. Polıtsııa jáne Tótenshe jaǵdaılar departamentteriniń qyzmetkerleri eskertý jasaǵanymen, keıbir turǵyndar jolǵa shyǵyp ketken. Saldarynan qutqarý jumystaryn júrgizýge týra keldi. Al Muǵaljar aýdanynda jol jabylǵan sátte júkti kelinshektiń tolǵaǵy bastalyp ketken.

«Búgin saǵat 11:45-te 112 qutqarý qyzmetine Aqtóbe oblysy Muǵaljar aýdany Jaryq aýylynda júkti áıeldiń aýyryp jatqany belgili boldy. Ol kezde aýylǵa barar-shyǵar jol jabylǵan edi. Munda jol talǵamaıtyn Trekol kóligi jiberilip, júkti kelinshek Muǵaljar aýdanynyń ortalyq aýrýhanasyna jetkizildi.

Sonymen birge Batys Qytaı – Batys Eýropa tasjoly boıyndaǵy Sarjansaı aýyly mańynda «Toyota Camry» markaly avtokólik joldan shyǵyp ketken. Qutqarýshylardyń jedel áreketiniń arqasynda 3 adam «Nur» kempıngine jetkizildi. Al Samara – Shymkent tas jolynyń 830 shaqyrymynda «VAZ-2106» markaly jeńil avtokólik buzylyp qalǵan. Qutqarýshylar kómegimen 4 adam «Sherhan» kempıngine jetkizildi», - dep habarlady oblystyq PD baspasóz qyzmetinen.

Sonymen birge ózbekstandyq jáne tájikstandyq azamattar mingen avtobýs jolaýshylaryna kómek kórsetildi. Áıteke bı aýdany Qarabutaq aýyly mańynda «VAN Hool» markaly avtobýstyń jolaýshylary qutqaryldy. Onda qazaqstandyq eki júrgizýshini qosqanda 110 adam bolǵan. Bári aýyldyq meshitke, sport mektebine ornalastyryldy. Eshkim medıtsınalyq kómekke muqtaj emes.

Foto, vıdeo: oblystyq TJD baspasóz qyzmeti.