Aqtóbe oblysynda 99 jastaǵy ardagerdiń kópten kútken armany oryndaldy

HROMTAÝ. QazAqparat – Jeńis kúni qarsańynda Aqtóbe oblysynyń ákimi Eraly Toǵjanov soǵys ardageri Vasılıı Ivanovıch Gretskııdi merekemen quttyqtaý úshin Hromtaý qalasyna bardy, dep habarlaıdy QazAqparat Aqtóbe oblysy ákiminiń baspasóz qyzmetine silteme jasap.

Vasılıı Gretskıı 1942 jyly Qyzyl ásker qataryna shaqyrylǵan. Ol 8-shi polktiń 1-shi kavalerııalyq korpýsy, 1-shi Ýkraına, 111-shi Belarýs, Polsha jáne Chehoslovakııa maıdandarynda soǵysqan.

Jaýyngerlik qyzmeti úshin 1944 jyldyń kúzinde memlekettik «Qyzyl juldyz» ordenine usynyldy. Keıin II dárejeli Otan soǵysy ordenimen nagrattaldy.

Vasılıı Ivanovıch jeńisti Berlınnen 75 shaqyrym jerde ornalasqan aýrýhanada qarsy alǵan. Keıin olardyń polki Oral qalasyna jiberiledi. 1946 jyly soǵysta alǵan jaraqattaryna baılanysty demobılızatsııalandy.

Eraly Toǵjanov 99 jastaǵy soǵys ardagerin kele jatqan Jeńis merekesimen quttyqtap, kórsetken erligi úshin alǵysyn bildirdi.

«Siz – ómirdi súıý jáne ol úshin qalaı kúresý kerektigin kórsetken naǵyz batyrsyz. Siz sekildi tózimdi, batyl, beıbitshilik úshin janyn berýge daıyn tulǵalardyń arqasynda biz baqytty jáne erkin ómir súrip jatyrmyz.

Búgin sizdi quttyqtaı otyryp, biz jeńis úshin kúreskenderdiń barlyǵyn ulyqtaımyz. Biz olardy árqashan este saqtaımyz! Sizdiń batyldyq pen Otanǵa degen súıispenshiligińizdiń arqasynda qol jetken bostandyq pen urpaq ómiri úshin sheksiz rızashylyǵymyzdy bildiremiz, taǵzym etemiz!» - dep atap ótti óńir basshysy.

Ardagerdi saltanatty túrde ulyqtaý rásimine qoǵam ókilderi, Hromtaý qalasynyń turǵyndary, oqýshylar qatysty.

«17 jastaǵy balamyz. Maıdanǵa attanyp, jeńiske jetý úshin bárin jasadyq. Sol soǵystan bári birdeı oralmady, maıdan dalasynda qaldy, biraq olardyń árqaısysy – bizdiń jadymyzda. Jer betinde árdaıym beıbitshilik ornasyn», - degen tilegin bildirdi Vasılıı Ivanovıch.

Bul kúni ardagerdiń kópten bergi armany oryndaldy. Ol turatyn kópqabatty úıdiń aýlasynda kontsert uıymdastyrylyp, jergilikti shyǵarmashylyq óner ujymdary soǵys jyldaryndaǵy ánderdi shyrqady.

Aıta ketsek, óńirde Jeńis kúnin taǵy eki ardager qarsy alady.

103 jastaǵy Satylǵan Bekmaǵambetov Aqtóbede turady. Ol 1941 jyly maıdanǵa shaqyrylǵan. Bir jyldan keıin 101-shi atqyshtar brıgadasynyń quramynda shaıqasqa qatysyp, Máskeý, Rjev, Smolensk mańyndaǵy qandy shaıqastarda jaýǵa tótep beredi, eki ret jaraqat alǵan.

Al, 99 jastaǵy Qaztaı Tynyshtyqov Muǵaljar aýdany Qumsaı aýylynda turady. Soǵys jyldarynda Ýkraınany, Kýrsk pen Belarýs elin azat etýge qatysyp, kóptegen medal, sonyń ishinde ekinshi dárejeli «Otan soǵysy» ordenimen nagradtaldy.

Sondaı-aq, aýdanǵa sapar barysynda oblys ákimi Hromtaý aýdanynyń qorǵanys isteri jónindegi bóliminiń jumysymen tanysty. Munda aımaq basshysy áskerge shaqyrý naýqanyn ótkizýge arnalǵan pýnktti qarap shyqty. Ǵımarat 2022 jyldyń tamyzynda paıdalanýǵa berilgen.