Aqtóbe oblysynda 735 mln dollar bolatyn bes iri joba iske asady
Astana qalasynda ótken jahandyq ınvestıtsııaǵa arnalǵan dóńgelek ústel Aqtóbe oblysy úshin tabysty boldy. Jıynǵa halyqaralyq kompanııa ókilderi men otandyq bıznes ıeleri, ınvestorlar, bedeldi sarapshylardy qosqanda barlyǵy 500-den astam adam qatysty.
«Aqtóbe oblysy – el úshin ekonomıkalyq jáne strategııalyq mańyzy zor Qazaqstandaǵy eń iri óńir. Aımaq hrom, tıtan, nıkel qory boıynsha dúnıejúzinde kóshbasshy. Kómirsýteginiń boljamdy qorynyń 30%-y shoǵyrlanǵan. Ónerkásiptik munaı qory respýblıka boıynsha úshinshi orynda. Biz taza, ınnovatsııalyq jáne ártaraptandyrylǵan ekonomıkalyq model ustanyp kelemiz. Bizdiń mindetimiz – ınvestorlardy tartý jáne jan-jaqty keshendi qoldaý», – dep atap ótti Eraly Toǵjanov.
Dóńgelek ústel men plenarlyq otyrysta álemdik ekonomıkanyń damýy, ınvestıtsııalyq tartymdylyq, álem jáne aımaqtyq ınvestorlar úshin jasalǵan múmkindik, azyq-túlik qaýipsizdigi jáne logıstıka máseleleri talqylandy. Іs-shara sońynda metallýrgııa, qurylys, densaýlyq saqtaý, ekologııa jáne logıstıka salalary boıynsha 735 mıllıon AQSh dollaryn quraıtyn 5 memorandýmǵa qol qoıyldy.
Endi Aqtóbede kólik-logıstıkalyq hab salady. Sonymen birge Qazaqstandaǵy eń iri bolat balqytý zaýytyn salý josparda bar.
Joba qazaqstandyq óndirýshiler úshin rels, temirjol dóńgelekteri, qurylys armatýralary jáne pishindi bolatty jasaýǵa arnalǵan ónimmen qamtamasyz etedi. Bul jylyna jalpy jıyntyǵy 990 mıllıon dollarǵa teń daıyndama men qurylys armatýralarynyń ımportynan aryltady jáne qazaqstandyq prokat óndirýshilerdi sapaly ónimmen qamtamasyz etedi. Zaýyt tolyq qýatynda jumys istegende 1500 adam jumyspen qamtylady.
Al Aqtóbe qalasynda kárizdik tazartý qondyrǵysynyń qurylysy bastalady. Bul qala ishindegi jaǵymsyz ıisti joıady ári aǵyndy sýdy tazartady.
«Eýropalyq qaıta qurý jáne damý banki» ınvestıtsııalyq jobany qarjylandyrýǵa daıyn. Jobanyń quny - 30 mıllıard teńge.
Tórtinshi memorandým medıtsına salasyna tıesili. Aqtóbede ıadrolyq medıtsına ortalyǵy salynady. Bul ortalyq onkologııalyq aýrýdy erte anyqtaýǵa múmkindik beredi.
«Mańyzdy jobanyń arqasynda Batys óńiriniń turǵyndary joǵary bilikti mamandandyrylǵan medıtsınalyq kómekke qol jetkize alady. Ortalyqtyń qyzmeti Aqtóbe qalasynyń medıtsınalyq týrızm salasyndaǵy tartymdylyǵyn arttyrýǵa yqpal etetinine senimdimin. Biz onyń salynýyna múddelimiz jáne ony júzege asyrýǵa jan-jaqty kómek kórsetýge daıynbyz», - dep basa aıtty oblys ákimi.
Besinshi iri joba - bıtým zaýyty. Aqtóbe oblysy bıtýmǵa degen óz qajettiligin tolyǵymen ótep, suranys bolǵan jaǵdaıda elimizdiń búkil batys aımaǵyn shıkizatpen qamtamasyz etýdi kózdep otyr. Zaýyttyń qýattylyǵy táýligine 500 tonnaǵa deıin bıtým emýlsııasyn jáne 1000 tonnaǵa deıin jol, qurylys jáne shatyr bıtýmyn shyǵarady. Jobanyń quny 50 mıllıon AQSh dollaryn qurap, óndiris iske qosylǵanda 100 jumys orny ashylady.