Aqtóbe oblysynda 32 adam koronavırýs ınfektsııasyn qaıta juqtyrǵan

AQTÓBE. QazAqparat – Aqtóbede koronavırýs ınfektsııasyn juqtyrǵan 1 210 adam aýrýhanada jatyr. Onyń 900-den astamy Aqtóbe qalasynda, dep habarlaıdy QazAqparat tilshisi.

Bir táýlikte taǵy 336 adamnan koronavırýs ınfektsııasy anyqtaldy. Kóbi Aqtóbe qalasynan. Sonymen birge Muǵaljar, Alǵa aýdardarynda da onnan astam adam aýyryp, dáriger kómegine júgingen. Aýrýshańdyqtyń ósý deńgeıi 1,5 % asty.

«Oblystyq klınıkalyq ınfektsııalyq aýrýhanada 155, Aqtóbe medıtsına ortalyǵynda 79, Aqtóbe oblystyq ftızıopýlmonologııalyq ortalyqta 446, Temirjol aýrýhanasynda 206 naýqas bar. Aýdandarda 315 adam em qabyldap jatyr. Ásirese Qobda, Hromtaý, Alǵa, Baıǵanın, Muǵaljarda kóp. Naýqastardyń 105-i jansaqtaý bólimine jatqyzylǵan. Sonymen birge 417 balaǵa da koronavırýs ınfektsııasy dıagnozy qoıyldy. Onyń 17-i aýrýhanaǵa jatty. Al 174 júkti áıeldiń 95-i aýrýhanada. Infektsııalyq kereýet júktemesi 65,8 % qurap otyr», - dedi oblystyq densaýlyq saqtaý basqarmasy bóliminiń bas mamany Ásııa Tirijanova. Aqtóbe oblysynda 32 adam koronavırýs ınfektsııasyn qaıta juqtyrǵan. Olar jazylǵan soń ońaltý sharasyna qatysady.

«Vaktsına qabyldaǵandardyń 483-i vırýs juqtyryp, aýyryp qaldy. Al vaktsınanyń eki komponentin saldyrǵan 4 adam tamyz aıynda kóz jumdy»,- dedi Ásııa Tirijanova.

Aıta keteıik, 259 myńǵa jýyq adam vaktsınanyń І komponentin, al 195 myńǵa jýyǵy ІІ dozasyn da saldyrdy. Qazirgi kezde vırýs juqtyryp, PTR synamasy oń mán kórsetken naýqastardyń 72 paıyzy jazyldy. Degenmen úı karantınindegi adam sany kún sanap artyp barady. Búginde olardyń sany 9 myńnan asty.