Aqtóbe oblysynda 110 gektar jer órtendi
Aqtóbe oblystyq tótenshe jaǵdaılar departamenti baspasóz qyzmetiniń habarlaýynsha, oqıǵa 15 qyrkúıek kúni saǵat 15:39-da tirkeldi. Habarlamada Qobda aýdany, Sýǵala aýyldyq okrýgi Kók úı aýyly mańyndaǵy dalalyqta 40 ga qurǵaq shóp jáne Qobda orman sharýshalyǵyna tıesili 10 gektar orman ekpesi órtengeni aıtylǵan. Shaqyrtý ornynda birneshe qyzmetker men tehnıka jiberilip, órt sóndirildi.
«Dalalyq órtti sóndirýge tótenshe jaǵdaılar departamentinen 50 qyzmetker, 7 birlik tehnıka, Qobda orman sharýashylyǵynan 13 adam, 4 tehnıka, eriktilerden 35 adam, 4 birlik tehnıka jumyldyryldy. Órt saǵat 21:06-da sóndirildi. Órttiń jalpy aýdany 10 ga, dala alqaby 40 ga. Sondaı-aq, shaqyrý ornyna Aqtóbe oblysy ákiminiń orynbasary Jaqsyǵalı Imanqulov jáne Aqtóbe oblysy TJD bastyǵy Marǵulan Amanbaev baryp, baqylaýǵa aldy», - dep habarlady TJD baspasóz qyzmeti.
Sondaı-aq 15 qyrkúıek kúni saǵat 18:15-te Mártók aýdany, Rodnıkovka aýyldyq okrýgi dala alqabynda ashyq alańda qurǵaq shóp órtendi. Órt saǵat 01:55-te shektelip, 02:30-da sóndirildi. Jalpy aýmaǵy 110 gektardy qurap otyr.
«Órtti sóndirýge TJD órt sóndirý qyzmetinen 56 adam jáne 8 tehnıka, erikti órt sóndirý qurylymynan 22 adam 7 tehnıka, Orman sharýashylyǵy 2 adam, 2 tehnıka jumyldyryldy. Zardap shekkender joq. Tabıǵı órtterdiń týyndaýyna, olardyń taralýyna jáne eldi mekenderge jaqyndaýyna jol bermeý úshin órt qaýipsizdigin este saqtaý qajet», - dep habarlady oblystyq TJD baspasóz qyzmeti.
Vıdeodan alynǵan kadr