Aqtóbe oblysyn damytýǵa aldaǵy 5 jylda 567 mlrd teńge jumsalady
«Qaraýǵa Aqtóbe oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi jospary usynylyp otyr. Keshendi jospar Aqtóbe oblysy boıynsha Aktóbe aglomeratsııasyn, munaı-gaz jáne kólik ınfraqurylymyn, taý-ken metallýrgııa keshenin, ónerkásiptik kooperatsııany, ǵylymı-medıtsınalyq jáne bilim berý klasterin damytýdy kózdeıtin 6 baǵyttan turatyn jáne 36 is-sharany qamtıdy. Jospardy iske asyrýdyń jalpy somasy 567 mlrd teńgeni quraıdy. Onyń ishinde respýblıkalyq bıýdjetten – 64,9 mlrd teńge, jergilikti bıýdjetten – 7,4 mlrd teńge, jeke ınvestıtsııalar – 478,7 mlrd teńge, sondaı-aq memlekettik-jekeshelik áriptestik arqyly 16,6 mlrd teńge»,- dedi ol.
Mınıstrdiń dereginshe, keshendi jospardyń birinshi bólimi Aqtóbe aglomeratsııasynyń ınfraqurylymyn damytýǵa 119,6 mlrd teńge somasyna 13 ınvestıtsııalyq jobalardy qamtıdy. Halyqtyń ómir súrý sapasyn arttyrý jáne jaǵdaıyn jaqsartý maqsatynda ınjenerlik-kommýnıkatsııalyq ınfraqurylymdy damytý jónindegi jobalar iske asyrylatyn bolady. Sonymen qatar, Keshendi jospar aıasynda Aqtóbe qalasyndaǵy káriz-tazartý qurylystaryn jańǵyrtý jáne turǵyn úı qurylysy aýdandarynda ınjenerlik-kommýnıkatsııalyq jelilerdi qamtamasyz etý josparlanyp otyr.
«Keshendi jospardyń ekinshi bólimi boıynsha munaı-gaz salasynda gaz óńdeý keshenin salý, jańa ken oryndaryn ıgerý jáne rezervtik ken oryndaryn paıdalanýǵa berýdi qamtamasyz etý, sondaı-aq qıyn óndiriletin munaıdy óndirý kezinde tehnologııalyq jańǵyrtýdy júrgizý josparlanýda. Úshinshi bólimde taý-ken metallýrgııa keshenin damytý boıynsha is-sharalardy iske asyrý kózdelýde. Jobalardy qarjylandyrý 48,3 mlrd teńge somasyna jeke ınvestıtsııalar esebinen júzege asyrylatyn bolady. Sondaı-aq, keshendi josparda ónerkásiptik kooperatsııany damytý boıynsha jobalar júzege asyrý josparlanǵan. Onyń ishinde 450 gektar ındýstrııalyq aımaqty qurý qamtylady», - dedi Áset Erǵalıev.
Onyń atap ótýinshe, besinshi bólim boıynsha kólik ınfraqurylymyn damytýǵa 11,1 mlrd teńgeni quraıtyn jobalardy júzege asyrý josparlanǵan.
«Aqtóbe oblysyndaǵy avtomobıl joldaryn rekonstrýktsııalaý óńiraralyq baılanystardy nyǵaıtýǵa septigin tıgizedi. Aqtóbe qalasy elimizdiń batys bóligindegi ósý ortalyǵy jáne iri kólik toraby retindegi rólin kúsheıtýge «Aqtóbe – Orsk» jáne «Aqtóbe qalasynyń ońtústik aınalma joly» sııaqty jobalar yqpal etetin bolady. «Aqtóbe – Hromtaý – Qarabutaq – Ulǵaısyn» jáne «Aqtóbe – Atyraý – Astrahan» avtomobıl joldaryn qaıta jańartýdy iske asyrý jaqsy jáne qanaǵattanarlyq jaǵdaıdaǵy joldardyń úlesin 61-den 95 paıyzǵa deıin ulǵaıtýǵa múmkindik beredi. Atalǵan jobalardy iske asyrý kórshiles óńirlermen jolaýshylar aǵyny men júk tasymalyn ulǵaıtady. Osylaısha, Aqtóbe oblysynyń taýar aınalymy 2025 jylǵa qaraı 1,5 esege – 2,3 trln teńgege deıin artady»,- dedi mınıstr.
Áset Erǵalıev keshendi jospardyń sońǵy bólimi boıynsha óńirdiń ǵylymı-medıtsınalyq klasterin damytý aıasynda 8,1 mlrd teńgeniń jobalary qarastyrylatyndyǵyn aıtady.
«Densaýlyq saqtaý jáne bilim berý júıeleri qyzmetteriniń qoljetimdiligi men sapasyn arttyrý úshin qazirgi zamanǵy ınfraqurylym qurý kózdelgen. 25 densaýlyq saqtaý nysanyna kúrdeli jóndeý júrgiziledi. Kóp beıindi aýrýhana, balalar onkogematologııa ortalyǵy salynady. Sondaı-aq densaýlyq saqtaý uıymdaryn joǵary tehnologııalyq medıtsınalyq tehnıkamen jabdyqtaý josparlanýda. Sonymen qatar Aqtóbe oblysy boıynsha 49 mektep jáne Aqtóbe qalasynda kolledj stýdentterine arnalǵan úsh jataqhana salý kózdelýde»,- dedi ol.