Aqtóbe oblysy: Karantındegi shekteý 1 mamyrdan bastap alynady

AQTÓBE. QazAqparat – Aqtóbe oblysynyń ákimdigi janyndaǵy jedel shtab qyzmettiń jekelegen túrlerine karantın rejımin jeńildetti. Shekteýdi alyp tastaý 3 kezeń boıynsha júzege asyrylady, dep habarlaıdy QazAqparat tilshisi.

Birinshi kezeń 1 mamyrda bastalady. Aldymen óndiristik kásiporyndar, qurylys jáne jol qurylysy, kólik kompanııalary, bankter jáne qarjy uıymdary, halyqqa jáne avtokólikterge qyzmet kórsetý ortalyqtary ashylady.

Saýda jáne qyzmet kórsetý salalarynda azyq-túlik dúkenderi, dárihanalar, optıka, atele, lombard, aıyrbastaý pýnkti, notarıaldyq qyzmetter, saqtandyrý qyzmeti, fotosalon, kıim jýý jáne hımııalyq tazalaý oryndary, kilem tazartý, aıaq kıim jóndeý, keńse tehnıkalaryn jóndeý sheberhanalary, tehnıkalyq baqylaý stansalary, dóńgelek jóndeý, kólik jýý nysandary óz jumysyn bastaıdy.

Talap boıynsha saǵat 10:00-den 18:00-ge deıin gúl-kóshet satatyn, qurylys dúkenderi, avtosalondar men turmystyq tehnıka dúkenderi halyqqa qyzmet kórsete alady.

«Óndiristegi sanıtarlyq-epıdemıologııalyq qaýipsizdikti qamtamasyz etýge arnalǵan mindetti talaptardy oryndasa, nysannyń daıyndyǵy týraly akt alsa jumys isteýge ruqsat beriledi. Sonymen birge karantın kezinde júrgiziletin profılaktıkalyq sharalarǵa jaýapty tulǵalardy bekitip, qyzmetkerlerdi jeke qorǵanys quralymen qamtamasyz etýi tıis. Jumys oryndarynda dezınfektsııa júrgizý mindetteledi. Nysanǵa qosalqy aýmaqtyń sanıtarlyq tazalyǵyn únemi qadaǵalaý qajat. Epıdemıologııalyq ahýal turaqtalyp, qalypty dınamıka saqtalsa, ekinshi kezeń - 8 mamyrda, úshinshi kezeń - 15 mamyrda engiziledi», - dep habarlady oblys ákimi janyndaǵy jedel shtab.