Aqtóbe oblysy ákimdigine basyp kirgen kúdiktilerdiń vıdeosy jarııalandy

AQTÓBE. QazAqparat – Aqtóbe oblystyq polıtsııa departamenti oblys ákimdiginiń ishine kirip, zattardy syndyryp, qıratqan kúdiktilerdiń áreketin kórsetti. Beınebaqylaý kamerasyndaǵy jazbany jarııalady, dep habarlaıdy QazAqparat tilshisi.

Aqtóbe oblystyq polıtsııa departamentiniń baspasóz qyzmeti 5-qańtarda túsirilgen beınematerıaldardy jarııalady.

Onda bir top adamnyń órt sóndirýshiler kóligine tarpa bas salyp, syndyrýǵa árekettengenin kórýge bolady.

«Tártipsizdik kezinde Aqtóbe oblysy TJD Órt sóndirý qyzmetiniń qyzmettik avtokólikterine shabýyl jasalǵan. Qylmyskerler órt sóndirý kóligin basyp alýǵa tyrysty jáne eki órt sóndirýshini taıaqtady», - dep habarlady oblystyq PD baspasóz qyzmetiniń jetekshisi Erbolat Sarqulov.

Sondaı-aq oblys ákimdigine bir top adam kirip, ondaǵy múlikti qırata bastaǵan sát beınebaqylaý kamerasyna túsip qaldy.

«5 qańtardaǵy mıtıng kezinde narazylyq bildirýshiler Aqtóbe oblysy ákimdiginiń ǵımaratyn basyp aldy. Birneshe kabınetti qıratyp, turmystyq tehnıkany urlap, zaqymdady. Narazy toptyń jıhazdar men terezelerdi syndyrǵany vıdeoda kórinip tur», - dep jazylǵan baspasóz paraǵynda.

Aıtyp óteıik, qazirgi kezde oblys ákimdigi shtattyq rejımde jumys istep tur. Boljam boıynsha shyǵyn - 300 mln teńge.