Aqtóbe oblystyq Tabıǵı resýrstar jáne tabıǵatty paıdalanýdy retteý basqarmasynyń basshysy taǵaıyndaldy
QR Memlekettik qyzmet isteri agenttiginiń kelisimi boıynsha Aqtóbe oblysy ákiminiń ókimimen Asqar Júsibálıev Aqtóbe oblysynyń tabıǵı resýrstar jáne tabıǵatty paıdalanýdy retteý basqarmasynyń basshysy laýazymyna taǵaıyndaldy. Ol 1963 jyly Aqtóbe oblysynyń Oıyl aýdanynda dúnıege kelgen. Eńbek jolyn Aqtóbeniń Isataı sovhozynda bastaǵan.
«1985 jyly Batys Qazaqstan aýyl sharýashylyǵy ınstıtýtyn, 2008 jyly Almaty ekonomıka jáne statıstıka akademııasyn, 2020 jyly Q.Jubanov atyndaǵy Aqtóbe óńirlik memlekettik ýnıversıtetin támamdaǵan. Eńbek jolyn 1980 jyly Aqtóbe oblysynyń Isataı sovhozynda jumysshy bolyp bastaǵan. 1985 - 1991 jyldary aralyǵynda «Aqyrap» keńsharynyń agronomy, Qazaqstan Jastar odaǵy Lenındik komıtetiniń hatshysy, Isataı aýdandyq Kommýnıstik partııa komıteti uıymdastyrý bóliminiń nusqaýshysy, Qobda aýdandyq Kommýnıstik partııa komıtetiniń uıymdastyrý, aýyl sharýashylyǵy bólimderiniń nusqaýshysy boldy. Al 1991 - 2011 jyldary aralyǵynda Qobda aýdandyq aýyl sharýashylyǵy basqarmasynyń bas agronomy, basqarmasy basshysynyń orynbasary, «Bestaý» JShS-niń dırektory, Aqtóbe oblystyq jer qatynastary basqarmasy bastyǵynyń orynbasary, QR Jer resýrstaryn basqarý agenttiginiń Aqtóbe jáne Batys Qazaqstan oblystary boıynsha óńiraralyq jer ınspektsııasynyń bastyǵy bolyp qyzmet etken. 2011 - 2018 jyldary aralyǵynda Qobda jáne Temir aýdandaryn basqarǵan. 2018 jyldyń qyrkúıek aıynan bastap osy ýaqytqa deıin Qarǵaly aýdanynyń ákimi qyzmetin atqaryp keldi», - dep habarlady Aqtóbe oblysy ákiminiń baspasóz qyzmeti.