Aqtóbe oblysynyń úsh jyldyq bıýdjeti bekitildi
Aqtóbe oblysynda aldaǵy úsh jylda bıýdjettiń 68%-y áleýmettik salaǵa baǵyttalady. Al qurylys, energetıka, jol salý men aýyl sharýashylyǵy, kásipkerlikti damytýǵa 91 mlrd teńge jumsalady. Bul shyǵystyń 21%-yna teń. Úsh jyldyq bıýdjet jobasy oblystyq máslıhattyń kezekti sessııasynda qaraldy.
— Qorǵanys jáne quqyq qorǵaý organdaryna 23 mlrd, jergilikti atqarýshy organ rezervine 1,6 mlrd teńge qarastyryldy. Al memlekettik-jekemenshik áriptestik jobalaryna 142 mln teńge josparlanǵan. Tótenshe jaǵdaılar qyzmetine tıesili nysandar jańarady. Baıǵanın jáne Mártók aýdandary ortalyǵyna órt sóndirý deposy salynady. Qurylysqa 1,8 mlrd teńge bólinedi. Bilim salasynda oryn tapshylyǵyn joıý úshin 5 mektep qurylysy jáne damýynda tejeýi bar balalarǵa arnalǵan mektepke qosymsha ǵımarat salý úshin 6,4 mlrd teńge qarastyryldy, — dedi Aqtóbe oblystyq ekonomıka jáne bıýdjettik josparlaý basqarmasynyń basshysy Nurjan Maqsatov.
Prezıdent tapsyrmasymen Aqtóbede jańa drama teatr salynady. Oblystyń máslıhatta qazaq mýzykalyq drama teatry qurylysynyń qujattaryna 123 mln teńge bólindi.
— Avtomobıl joldary basqarmasyna 34 mlrd teńge josparlandy. Oblystyq mańyzy bar joldardy qaıta jańartý, ortasha jóndeý úshin 4 jobaǵa 3 mlrd teńge qarastyryldy. Budan basqa aýdandyq mańyzy bar joldardy, kópirdi salý jáne qaıta jańartý, kúrdeli, ortasha jóndeý boıynsha 16 joba iske asyrylady. Oǵan 8,5 mlrd teńge jumsalady. Aqtóbe qalasy men aýdandar boıynsha kólik ınfraqurylymyn damytý úshin 50 jobaǵa 20 mlrd teńge josparlandy. 2025 jyly 5 eldi mekendi sýmen qamtý úshin 3,1 mlrd teńge bólinedi. 16 eldi mekendi gazben jabdyqtaý jumystaryn aıaqtaýǵa, 16 eldi meken úshin qajetti qujattar ázirleýge 1,9 mlrd teńge qarastyryldy, — dedi Nurjan Maqsatov.
Eske salsaq, buǵan deıin Aqtóbe qalasynyń 2025-2027 jyldarǵa arnalǵan bıýdjeti «Ashyq NQA» portalyna shyǵyp, talqylandy.