Aqtóbe oblysynyń prokýrory aýysty

<p>ASTANA. KAZINFORM &ndash; Memleket basshysynyń kelisimimen Bas Prokýrordyń buıryǵymen aǵa ádilet keńesshisi Marat Baıanuly Ábishev Aqtóbe oblysynyń prokýrory bolyp taǵaıyndaldy.</p>

Bas prokýratýra málim etkendeı, taǵaıyndalǵanǵa deıin ol Bas prokýratýranyń Qoǵamdyq múddelerdi qorǵaý qyzmetiniń bastyǵy laýazymyn atqarǵan.

Marat Ábishevtiń ortalyq apparattyń beıindi bólimshesine basshylyq jasaýdy jáne prokýratýra organdarynyń qoǵamdyq múddelerdi qorǵaý salasyndaǵy qyzmetin úılestirýdi qosa alǵanda, aıtarlyqtaı jumys tájirıbesi bar. Ol el Prezıdenti qoıǵan mindetterdiń oryndalýyna, sonyń ishinde iri ınvestıtsııalyq jobalardy súıemeldeýge, paıdalanylmaǵan jerlerdi memleketke qaıtarýǵa, azamattardyń eńbek quqyqtary men halyqtyń áleýmettik osal toptaryn qorǵaýǵa jetekshilik etti.

M.B. Ábishev 1979 jyly 5 qyrkúıekte Qaraǵandyda dúnıege kelgen.

Prokýratýra organdaryndaǵy qyzmetin 2000 jyly Qaraǵandy oblysynyń Jezqazǵan qalasy prokýrorynyń kómekshisi bolyp bastaǵan. Keıin Bas prokýratýrada prokýror, sodan keıin Azamattyq jáne ákimshilik ister boıynsha sot aktileri men atqarýshylyq is júrgizýdiń zańdylyǵyn qadaǵalaý departamentiniń basqarma prokýrory qyzmetterin atqarǵan.

Sondaı-aq, Shyǵys Qazaqstan oblysy Zyrıan aýdandyq sotynyń sýdıasy bolyp jumys istegen. Ár jyldary Bas prokýratýranyń Sottarda memleket múddesin qorǵaý departamentiniń aǵa prokýrory, bólim basshysy, departament basshysynyń orynbasary, Qostanaı oblysy prokýrorynyń orynbasary jáne birinshi orynbasary, sondaı-aq Bas Prokýror Apparaty basshysynyń orynbasary laýazymdarynda qyzmet etti.

Prokýratýra organdaryndaǵy jalpy jumys ótili 22 jyldan asady. Kásibı jetistikteri úshin II dárejeli «Aıbyn» ordenimen jáne «Jaýyngerlik erligi úshin» medalimen marapattalǵan.

Buǵan deıin Mańǵystaý oblysy Tótenshe jaǵdaılar departamentinde úsh taǵaıyndaý bolǵanyn habarladyq.