Aqtóbe oblysynyń bas ımamy taǵaıyndaldy

<p>AQTÓBE. KAZINFORM &ndash; QMDB Tóraǵasynyń keńesshisi Kenjetaı Dúısenbaı Aqtóbe oblysynyń bas ımamyn tanystyrdy. Bas ımam qyzmetine Amantaı Sadıev taǵaıyndaldy.&nbsp;</p>

QMDB tóraǵasy, Bas múftı Naýryzbaı qajy Taǵanulynyń buıryǵymen Amantaı Sadıev Aqtóbe oblysynyń bas ımamy qyzmetine taǵaıyndaldy. Aqtóbe oblystyq ortalyq «Nur Ǵasyr» meshitinde QMDB Tóraǵasynyń keńesshisi Kenjetaı Dúısenbaı bas ımamy qyzmetin atqarǵan Serikjan Enshibaıulyna rızashylyǵyn bildirdi.

– Serikjan Enshibaıuly osy jyldar ishinde Aqtóbe oblystyq ókildiginiń qyzmetin jandandyryp, oblystaǵy dinı ahýaldy jaqsartýǵa kúsh saldy. Dinı maman turaqtandyrý, dinı kadr daıarlaý isterin jolǵa qoıdy. Jańadan kelip jatqan bas ımam da bóten emes. Aqtóbe qalalyq ortalyq meshitinde bas ımam bolyp qyzmet etken. Tájirbıeli dinı maman, - dedi Bas múftıdiń keńesshisi. 

Aqtóbe oblystyq ortalyq «Nur Ǵasyr» meshiti baspasóz qyzmetiniń habarlaýynsha, Sadıev Amantaı Ábildauly «Nur Múbarak» Egıpet ıslam ýnıversıtetiniń túlegi. Almaty ıslam ınstıtýtynda, Túrkııa eliniń Manısa qalasyndaǵy Quran kýrsynda, Túrkııanyń Býlý qalasyndaǵy Quran kýrsynda oqyǵan. 5 tildi jetik meńgergen maman. Atyraý, Ońtústik Qazaqstan, Jambyl obylstary men Aqtóbe qalalyq ortalyq meshitinde bas ımam, ımam qyzmetterin atqarǵan. Osy ýaqytqa deıin Almaty qalasy Alataý aýdany «Beket ata» meshitiniń bas ımamy qyzmetin atqaryp keldi. 

Aıta keteıik, osy aıda Qazaqstan Respýblıkasy mádenıet jáne aqparat mınıstriniń buıryǵymen Erjan Bolatqanuly Núkejanov Din isteri komıtetiniń tóraǵasy qyzmetine taǵaıyndaldy.