Aqtóbe oblysynyń ákimi óńirde qalyptasqan jaǵdaı jóninde beınejazba jarııalady
Ol keltirgen málimetterge qaraǵanda, oblystaǵy 7 respýblıkalyq jáne 7 oblystyq mańyzy bar avtojoldar jabyq.
«Apattyq-qutqarý jumystaryna 46 polıtsııa jasaǵy, tótenshe jaǵdaı, áskerı bólimderi men jergilikti atqarýshy organdardan 81 tehnıka, 211 jeke quram tartyldy. Oblystyń 8 aýdanynyń ortalyǵynda, ıaǵnı Qarǵaly, Qobda, Áıteke bı, Alǵa, Muǵaljar, Hromtaý, Baıǵanın, Mártók aýdandarynda 11 jylytý pýnkti ashyldy. Olarǵa 427 adam, onyń ishinde 18 áıel jáne 20 bala ornalastyryldy. 8 avtobýs qar qursaýynan shyǵarylyp, 157 adam, onyń ishinde 17 bala evakýatsııalandy jáne jaqyn jerdegi jylytý pýnktterine jetkizildi. Polıtsııa trassalardaǵy 50-den astam avtokólikti qutqardy», - degen Ashat Shaharov óńirdegi jaryq berý máselesine toqtalǵan, brıgadalardyń túnimen jumys isteıtinin atap ótti.
«Oblystaǵy 56 aýyldyń 27-si jaryqqa qosyldy. Ol - 2700 abonent. Aqtóbe qalasynda da jaryq sóndi. Qala jáne aýdandarda jaryq berý jumystary úzdiksiz júrgiziledi», - dep atap ótti oblys ákimi.
Al sýmen qamtý boıynsha «Tómengi Qarǵaly» jáne «Tamdy» toǵandary, sondaı-aq qalanyń sý tazartý nysandarynyń jumysy qalpyna keltirilgen.
Beınejazba sońynda óńir basshysy syn saǵatta kúndiz-túni qoldaý kórsetip, joldaǵy azamattarǵa barynsha qol ushyn sozyp jatqan meıirimdi jandarǵa, volonterlarǵa alǵys aıtyp, barshany oryn alǵan jaǵdaılarǵa túsinistik tanytyp, sabyr saqtaýǵa shaqyrǵan.
«Biz árqashan birgemiz. Amandyqta bolaıyq», - dep sózin túıindedi Ashat Shaharov.