Aqtóbe oblysyndaǵy Quılys aýylynda bógetten sý ótip ketti

<p>AQTÓBE. KAZINFORM &ndash; Aqtóbe oblysy Yrǵyz aýdany Quılys aýylynda keshe túnde bógetten sý ótip ketti. Tolqyn kúsheıgen kezde bógeý jumystary qaıta jandandy.</p>

Yrǵyz aýdanyndaǵy Quılys aýylynda sý tasqynyna qarsy kúres jumystary 4 sáýir kúni bastaldy.

Búginge deıin bógetti bekitý jumysy jalǵasyp jatyr. Keshe túnde tolqyn kúsheıip, sol bógetten sý ótti.

- Túnde jaǵdaı qıyn boldy. Jel kúsheıip, tolqyn boldy. Teńiz jaǵasy qandaı bolsa, bizde de sondaı jaǵdaı. Qorqynyshty boldy, sebebi aýyl mańy teńiz sııaqty sýǵa toldy. Jeldiń jyldamdyǵy sekýndyna 40 metrdi qurady desek bolady. Biraq aýyl sýǵa ketpedi. Qazirgi kezde 100 adam jumys istep jatyr. Aýylda 12 tehnıka bar. 4 tıegish, 7 KamAZ jáne 1 K700 bar. Mundaǵy jaǵdaıdy kelip, kórý kerek. Bizdiń tasqynmen kúresip jatqanymyzǵa 50 kún boldy. Bul shalshyq emes, bul úlken sý. Sý áli kelip jatyr, - dedi Táýip aýyldyq okrýginiń ákimi Kamal Tileýjanov.

Aqtóbe oblysy ákiminiń baspasóz qyzmetiniń habarlaýynsha, aýylda 100 adam jumys istep jatsa, onyń 40-y №20982 áskerı bóliminiń 40 qyzmetkeri. Azyq-túlik jáne janar-jaǵarmaı men qapshyqtar aýdan ortalyǵynan jetkizilip jatyr. Al Aqtóbe oblystyq TJD baspasóz qyzmetiniń habarlaýynsha, aýyldyń shetinde ornalasqan bógetten sý ótken, degenmen bógeý jumystary júrgizildi. Al úılerge sý kirgen joq.