Aqtóbe oblysyndaǵy balabaqshada 240 mln teńgeden astam bıýdjet qarajaty jymqyrylǵan

<p>AQTÓBE. KAZINFORM - Aqtóbe oblysynyń Hromtaý jáne Muǵaljar aýdandary prokýratýralary mektepke deıingi mekemelerde&nbsp;240 mln teńgeden astam bıýdjet qarajatyn talan-tarajǵa salý faktilerin anyqtady.</p>

«Bıýdjet qarajaty jumysshylarǵa qosymsha syılyqaqy berýde bıýdjettik ótinimderdi negizsiz joǵarylatý arqyly ıemdenilgen. Baqylaýsyz ózgerister engizilip, onyń ishinde basshylarǵa syılyqaqy berý týraly buıryqtarǵa somalardy asyra kótergen. Iemdenip alý shemalary jalaqyny belgilengen normadan tys aýdarý, aýdarymdardy qaıtalaý, jalǵan issaparlar arqyly júzege asyrylǵan», - delingen oblystyq prokýratýra habarlamasynda.

Sonymen qatar esepshilerdiń biri keıbir qyzmetkerlerge joǵarylatylǵan jalaqy, qosarlanǵan eńbek demalysy men issapar tólemderin zańsyz esepteý arqyly jalpy kólemi 24 mln teńgeden astam qarajatty ıemdengen.

Osy qarajat eshqandaı negizsiz esepshiniń nemese balabaqsha meńgerýshisiniń jeke esepshottaryna aýdarylǵan.

Aýdan prokýratýralarymen aýdandyq bilim bóliminiń burynǵy basshylaryna, 3 balabaqsha meńgerýshileri men 4 esepshilerine qatysty QK-tiń 189-babynyń 4-bóliginiń 2-tarmaǵymen (asa iri mólsherde cenip tapsyrylǵan bóten múlikti ıemdenip alý nemese talan-tarajǵa salý) sotqa deıingi tergep-tekserý bastaldy.

Barlyq kórsetilgen fakti boıynsha Sybaılas jemqorlyqqa qarsy kúres qyzmetimen sotqa deıingi tergep-tekserýler júrgizilip jatyr.

Aqtóbe oblysynda avtojoldar qurylysyn baqylaıtyn tsıfrlyq platforma iske qosylǵanyn jazǵan bolatynbyz.