Aqtóbe oblysynda sý tasqynynan zardap shekkender úshin tamyz aıynda 400-den astam jańa úı tapsyrylady
Aımaq sý tasqynynan eń kóp zardap shekkenderdiń biri sanalady – 1020 úı men saıajaı qurylysy apatty dep tanylǵan.
«Bizdiń aldymyzda 502 úı salý jáne 518 úı men páter satyp alý mindeti tur. Búgingi tańda 475 úı men páter satyp alyndy, jumystar 91,7%-ǵa oryndaldy. Tamyz aıynda 400-den astam úıdi kezeń-kezeńimen tapsyrý josparlanyp otyr. Qurylysta qoldanylatyn barlyq materıal Aqtóbe oblysynda shyǵarylǵanyn atap ótkim keledi. Qurylys materıaldary jetkilikti, tapshylyq joq», — dedi óńir basshysy Ashat Shaharov.
Búginde Temir aýdanynyń Qumsaı aýylynda 21 úıdiń árleý jumystary júrgizilýde, ınjenerlik ınfraqurylym tartylyp jatyr. Qurylysqa BI Group kompanııasy qarajat bóldi.
Muǵaljar aýdanynyń Jaǵabulaq jáne Birlik aýyldarynda BI Group kompanııasy esebinen salynǵan 14 úıdi paıdalanýǵa berýge daıyndap jatyr. Merdigerler ýchaskelerge ınjenerlik jelilerdi tartý jumystarymen aınalysýda. Jergilikti turǵyndardyń ótinishi boıynsha bul aýyldarda feldsherlik-akýsherlik pýnkt pen balabaqsha qurylysy bastalyp ketti.
Aýqymdy qurylys Oıyl aýdanynda júrgizilip jatyr. «Qamqor-Aqtóbe 2024» qory Qaratal aýylynda 128 úı jáne Oıyl aýylynda taǵy 21 úı salý jobasyn qarjylandyrǵan. Sondaı-aq, Qaratal aýylynda bóget salynýda.
Qobda aýdanynyń Qobda aýylynda 130 otbasy jańa turǵyn úıge kóshedi. Qazir munda 10 merdiger uıym jumys isteýde. Barlyq 130 úıdiń qabyrǵalary qalanyp, shatyrlary jabylyp, ishki qurylys-montaj jumystary júrgizilýde. Aýdanǵa Bolat Ótemuratov qory qarjylaı kómek kórsetti. Jyl saıyn aýyldy sý basýyna jol bermeý maqsatynda jergilikti bılik ózen boıyndaǵy qorǵanys bógetterin kóterip jatyr.
Yrǵyz aýdanynda «Qamqor-Aqtóbe 2024» qory esebinen Yrǵyz aýylynda 51 úı jáne Nura aýylynda taǵy 63 úı salynýda.
Aqtóbe oblysynda barlyǵy 50-den astam merdiger mekeme baspanalardy qalpyna keltirý jumystaryna jumyldyryldy. Qarqyndy arttyrý úshin vıtse-premer Oıyl jáne Yrǵyz aýdandaryna jumys kúshin jáne qosymsha tehnıka tartýdy tapsyrdy.
«Úılerdiń 95%-y tamyz aıynyń sońyna deıin tapsyrylady. 15 qyrkúıekke deıin biz sý tasqynynan zardap shekkenderdiń barlyǵyn baspanamen qamtý mindetin qoıdyq. Qalǵan 5%-y Yrǵyz aýdany, onyń ishinde Nura aýylyna qatysty. Onda qurylys jumystary sý deńgeıiniń joǵary bolýyna baılanysty bir aıdan keıin bastaldy edi. Men qurylys brıgadalarynyń sanyn kóbeıtý týraly tapsyrma berdim. Sonymen qatar, zardap shekken alty aýdanda joldar, ınjenerlik ınfraqurylym qalpyna keltirilýde. Yrǵyz aýdanynda aýyz sý jáne elektrmen qamtamasyz etý máselesi bar, bir aı ishinde ákimdik bul máseleni sheshýi tıis», — dedi Qanat Bozymbaev.
Anyqtama: Aqtóbe oblysynda 4 521 otbasy jalpy somasy 1,6 mlrd. teńgege 100 aılyq eseptik kórsetkish mólsherinde birjolǵy áleýmettik kómek aldy. 4 083 úıdiń materıaldyq múlkin óteý boıynsha 1,4 mlrd teńge somasyna tólem berildi.