Aqtóbe oblysynda Respýblıka kúni qarsańynda alǵash ret jańa ońaltý ortalyǵy ashyldy
Aýtızmi jáne basqa da oı-sana kinárattary bar balalarǵa arnalǵan ortalyq kúndiz qyzmet etedi. Ol Aqtóbe qalasy Sáńkibaı batyr dańǵyly №171B mekenjaıynda ornalasqan. Ortalyqty Respýblıka kúni qarsańynda Aqtóbe oblysynyń ákimdigi, «Samuryq-Qazyna» qory «Qazaqstan halqyna» jáne «Qamqorlyq» qorlarymen birlese iske qosty.
«Mine, ulttyq mereke – Respýblıka kúni qarsańynda, mentaldy buzýshylyqtary bar balalarǵa arnaýly áleýmettik qyzmetter kórsetetin memlekettik mekeme ashyp otyrmyz. Oblysta 18 jasqa deıingi mentaldy buzýshylyqtary bar 635 múgedek bala esepte tur. Búgin ashylatyn ortalyqtyń mamandary balalar men olardyń otbasylaryna nátıjeli kómek alýǵa jaǵdaı jasaıdy. Jyl saıyn 50-den 100 balaǵa deıin keshendi qyzmetter kórsetiledi», - dedióńir basshysy Ashat Shaharov.
«Qamqorlyq» jańa ortalyǵy aýtızmmen aýyratyn balalardy tárbıelep otyrǵan otbasylarǵa bir jerde shoǵyrlanǵan mamandar arqyly ádistemelik keshendi kómek alýǵa múmkindik beredi. Ortalyq 1,5-ten 18 jasqa deıingi balalardy qabyldaıdy, tek bilim berý sabaqtary men ońaltý ǵana emes, sonymen qatar áleýmettik-turmystyq baǵdarlaýdyń mańyzdy daǵdylaryn usynady. Munda olarǵa tósek jınaý, qonaqtarǵa dastarhan jaıý, kıim útikteý, ydys jýý, sonymen qatar tamaq ázirleý sekildi turmystyq daǵdylar negizderi úıretiledi. Bul balalardyń jan-jaqty damýy jáne táýelsiz bolýyna kómektesedi.
Bolashaqta jasóspirimder ózderin qamtamasyz etý úshin aǵash ustasy, qysh jáne tigin sheberhanalarynda sabaqtar qarastyrylǵan. Sondaı-aq, ortalyqta vızýaldy baılanys ornatýda qıyndyqtary bar balalar úshin robototerapııa qoldanylady. Onda balalar robottarmen ózara qarym-qatynas jasaýdy úırenedi. Sonymen qatar, legoterapııa, robototehnıka, art-terapııa jáne mýzykalyq terapııa sabaqtary balalardyń damýyna ǵana emes, áleýmettenýine, qoǵamǵa enýine jáne tolyqqandy ómir súrýine septigin tıgizedi.
«Erekshe bala asyrap otyrǵan ár ata-ana úshin bul ortalyqtardyń mańyzy zor. Bizdiń maqsatymyz – eldiń barlyq óńirin qamtı otyryp, erekshe balalardy jaqyn jerden qoljetimdi ári tıimdi ońaltýmen qamtamasyz etý», - dedi «Samuryq-Qazyna» AQ korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.
Aıtyp óteıik, bul ortalyqtan bólek, «Samuryq-Qazyna» AQ kompanııalary tobynyń biryńǵaı qaıyrymdylyq operatory – «Samruk-Kazyna Trust» qorynyń qarjylandyrýymen ońaltý jáne erte aralasý ortalyqtary jumys istep, árqaısysy jylyna 600 balany qamtyp otyr. Búginde 1994 bala qabyldanyp, 153-i táı-táı basyp, alǵashqy qadamyn bassa, al 331-i alǵashqy sózin aıtty.