Aqtóbe oblysynda naýqastar tıisti dári-dármekterdi tolyq kólemde almaǵan

<p>ASTANA. KAZINFORM - Aqtóbe oblysynyń prokýratýrasy Alǵa jáne Oıyl aýdandyq aýrýhanalarynyń qyzmetinde azamattarǵa tegin qyzmet kórsetý boıynsha birqatar zań buzýshylyqtardy anyqtady.</p>

Alǵa aýdanynyń aýdandyq aýrýhanasy sozylmaly aýrýmen esepte turǵan 74 adamǵa qajetti analızderdiń mindetti mınımýmyn saqtamaǵan.

Mysaly, gıpertonııalyq aýrýmen esepte turatyn naýqas A.-ny aýdandyq aýrýhananyń medıtsına qyzmetkerleri der kezinde teksermegen, oǵan tıisti medıtsınalyq qyzmet kórsetilmegen, zertteý jumystary júrgizilmegen.

Arterııalyq gıpertenzııa dıagnozymen esepte turǵan, júrek zaqymdanýy basym naýqastardy qajetti tegin dári-dármekpen qamtamasyz etpeýdiń 36 jaǵdaıy anyqtaldy.

Aqtóbe oblysy prokýratýrasy aralasýynan keıin ǵana zań buzýshylyqtar joıylyp, 100-den astam adam qajetti dári-dármekpen jáne qyzmetpen qamtamasyz etildi.

Sonymen qatar, qaıtys bolǵandarǵa medıtsınalyq qyzmet kórsetý faktileri anyqtaldy. Kórsetiletin medıtsınalyq qyzmetterdiń sanyn asyra baǵalaý maqsatynda bul qyzmetter derekter bazasyna engizildi.

Mysaly, 2023 jyldyń qazan aıynda aýdandyq aýrýhana aýdan turǵyny S.-ny jalpy medıtsınalyq tekserýden ótkizse, al ol 2023 jyldyń shilde aıynda qaıtys bolǵan.

Prokýrorlyq qadaǵalaý aktisi boıynsha zań buzýshylyqqa jol bergen laýazymdy tulǵalar qatań tártiptik jaýaptylyqqa tartyldy.