Aqtóbe oblysynda 866 shaqyrym avtojol jóndeýden ótti

<p>AQTÓBE. KAZINFORM &ndash; Bıyl óńirde 322 shaqyrym respýblıkalyq jáne 544 shaqyrym jergilikti mańyzy bar avtojol, onyń ishinde 175 shaqyrym kóshe joly jóndeledi. Osylaısha, jaqsy jáne qanaǵattanarlyq jaǵdaıdaǵy joldardyń úlesi 80%-ǵa jetti. Bul týraly oblystyq ákimdiktiń baspasóz qyzmeti málim etti.&nbsp;</p>

Oblys ákimi Ashat Shaharov qalany aralap, Máńgilik el, H.Dosmuhameduly, Ǵ.Jubanova jáne Kirpishtidegi kóshelerge jol salyp jatqan merdigerlermen kezdesti. Jumys qarqynymen tanysty. Óńirde bıyl qansha jol qalpyna keltirilip, jóndeletini týraly aıtyp berdi.

2024 jyly aımaqta «Aqtóbe – Qarabutaq – Ulǵaısyn» halyqaralyq mańyzy bar tasjolyn qaıta jańartý mańyzdy jobasy bastaldy. Uzyndyǵy 262 shaqyrymdy quraıtyn jol 7 ýchaskege bólingen. Bıyl qurylys jumystary 2 ýchaskede júrgiziledi, onyń uzyndyǵy – 56 shaqyrym. Bul maqsatqa 16 mlrd teńge bólindi. Jol tórt jolaqty bolady.

Foto: Aqtóbe oblysynyń ákimdigi

Budan ózge, «Qandyaǵash – Embi – Shalqar» trassasyn jóndeý bıyl aıaqtalady degen jospar bar.

Sonymen qatar, aýdan ortalyqtary men eldi mekenderde 105 kóshe nemese 91 shaqyrymdyq aýylishilik jol jańa kúıge enedi.

Oblys ortalyǵynda 80 shaqyrymnan astam jol jóndeledi. Qazirgi ýaqytta Aqtóbedegi Máskeý aýdanyndaǵy joldarǵa kúrdeli jóndeý jumystary júrgizilýde. Bul jumystarda bıyl aıaqtalady. Sondaı-aq, Altyn Orda shaǵyn aýdanynda Sáńkibaı batyr dańǵylynan Ońtústik aınalma jolǵa deıin tórt jolaqty aınalma jol salynady. Sol ýchaskeden Máńgilik el kóshesiniń jolyn salý jalǵasady. Budan basqa, «Jaıly mektep» ulttyq jobasy aıasynda iske asyrylyp jatqan mektepterge kireberis jáne turǵyn alaptary joldarynyń qurylysy bastalady. Jóndeý respýblıkalyq jáne jergilikti bıýdjetterden qarjylandyrylady.

«Aqtóbe qalasynda 198 kósheni jóndeýge shart jasaldy. Degenmen, bunyń bári bıyl paıdalanýǵa beriledi degendi bildirmeıdi. Biz aldymen, qoǵamdyq kólik júretin joldardy jáne oqý oryndarynyń kireberis joldaryn retke keltiremiz. Sondaı-aq, oblys ortalyǵyndaǵy taǵy 18 kósheni jóndeý úshin kelisimshartqa qol qoıý josparlanýda. Oǵan 7 mıllıard teńge qajet. Ortasha jóndeýdi qajet etetintasjoldarda da jumysty júrgizý kerek. Qarajattyń múmkindigine qaraı, jumysty jalǵastyramyz», - dep qorytyndylady oblys ákimi.